El Principáu empecipia la renovación del corredor del Navia con una inversión de 10,9 millones

   UVIÉU, 9 Mar. (EUROPA PRESS) -

   El Gobiernu d'Asturies empecipió les obres de meyora y renovación del corredor del Navia (AS-12, Navia-Alto del Xardón) nel tramu Boal-Doiras, con una inversión de 10.980.000 euros. Los trabayos empezaron con cola tala d'árboles necesaria pa dexar la entrada de la maquinaria que va acometer los llabores de llimpieza y roza previes al movimientu de tierres.

   El proyectu, de la UTE formada poles empreses Inxeniería de Construcción y Obra Civil d'Asturies y Trabayos Salense S.L., cunta con un plazu de 30 meses y va suponer dotar a la carretera d'una sección tresversal más amplia y uniforme de siete metros, amenorgar el llargor del trazáu, encurtiando asina los tiempos de viaxe, y ameyorar la seguridá de la vía.

   Los 8,33 kilómetros qu'agora mesmu dixebren Boal de Doiras van quedar en 7,38 col nuevu trazáu. Trátase d'un tramu bien tropezosu con curves bien zarraes qu'escurre poles localidaes de San Llouguís y Peiróis. La intervención prevé variar los trazaos ameyorando los radios de xiru pa llograr asina meyores condiciones de visibilidá y seguridá.

   La obra inclúi la construcción d'un viaductu de 136 metros de llargor sobre'l regueru Muñón. Coles mesmes, va remocicase la intersección del AS-12 coles carreteres AS-35 y BO-2 al altor de San Llouguís, adaptándola al nuevu trazáu: van ameyorase los radios de xiru, van habilitase cuñas de cambéu de velocidá pa incorporaciones y salíes y va anovase la señalización vertical y horizontal.

   L'actuación contempla tamién la execución d'un nuevu firme en tol tramu, la optimización de los sistemes de drenaxe y l'actualización completa de la señalización vertical y horizontal. Amás, van restaurase les turries con revegetación y van llantase especies arbóreas autóctones como parte del acondicionamientu xeneral de la vía.