El Principáu entama unes xornaes pa "poner en valor el tren como'l tresporte del futuru"

   UVIÉU, 19 May. (EUROPA PRESS) -

   El director xeneral d'Axenda 2030 del Gobiernu asturianu, Juan Ponte, presentó esti llunes les xornaes 'El ferrocarril: exe vertebrador y sostenible del territoriu', que van celebrase los díes 23 y 24 de mayu en Xixón.

   Durante l'actu, Ponte defendió la necesidá de potenciar el tren como pieza clave na llucha contra'l cambéu climáticu y en favor de la eficiencia enerxética. "El tresporte del futuru yá esiste y llámase ferrocarril", aseguró, de la que recordó qu'una cuarta parte de les emisiones mundiales de gases d'efectu invernaderu provien del tresporte de persones y mercancíes.

   "Tenemos de sofitar decididamente un modelu de tresporte sostenible. El ferrocarril demostró ameyorar la conectividad, ser menos contaminante, fomentar la movilidá sostenible y contribuyir a que los asentamientos humanos sían más accesibles y habitables", precisó'l director xeneral.

   Tamién señaló que'l tren va ganando terrenu en tol mundu, y sorrayó qu'en tolos cumes mundiales y conferencies de Naciones Xuníes sobro desenvolvimientu sostenible destácase la necesidá de garantizar l'accesu universal a medios de tresporte equitativos, accesibles, saludables y sostenibles.

   "Apurrir un tresporte públicu, colectivu y algamadizu de forma equitativa ye urxente pa combatir el cambéu climáticu na actual situación d'emerxencia", alvirtió.

   "Dende la Dirección Xeneral d'Axenda 2030 defendemos un modelu de tresporte públicu con un enfoque social, climáticu y vertebrador del territoriu; concebíu como un derechu, y non como un negociu", añedió.