El príncipe Enrique va asistir a la coronación del so padre

MADRID, 12 Abr. (EUROPA PRESS) -

El príncipe Enrique, fíu menor del rei Carlos III, va asistir en mayu a la coronación del so padre, anque lo va facer ensin la compañía de la so esposa, Meghan Markle, que se va quedar n'Estaos Uníos colos sos fíos, informó esti miércoles el Palaciu de Buckingham.

La Casa Real británica confirmó nun comunicáu l'asistencia del duque de Sussex pal actu del 6 de mayu na abadía de Westminster, al que van dir unos 6.000 invitaos. Va facelu solu, porque "la duquesa de Sussex va quedar en California col príncipe Archie y la princesa Lilibet".

La figura del príncipe Enrique, quintu na llinia de sucesión al tronu, convirtióse en motivu recurrente de polémica en Reinu Uníu, depués de que tanto él como la so pareya arrenunciaren a exercer llabores propios de la familia real y denunciaren situaciones d'acosu. A les primeres crítiques públiques siguiéron-y un llibru de memories y un documental onde faló de la so vida.

El fíu menor del agora rei y de Diana de Gales vive n'Estaos Uníos y malapenes ta en Reinu Uníu. Viaxó por sorpresa en marzu p'asistir a un xuiciu en Londres contra un grupu de medios acusaos de práctiques corruptes, depués de que nun se tuviera constancia de viaxe dalgún dende'l funeral en memoria de la so güela, Sabela II, en setiembre de 2023.