Un recopilatoriu de los 25 años de Dixebra, primer publicación de la discográfica L'Aguañaz tres la so salida d'Ámbitu

DIXEBRA/EP

UVIÉU, 21 d'Avientu (EUROPA PRESS)

Discos L'Aguañaz entama la so nueva andadura en solitario tres la so salida del grupu Publicaciones Ámbitu, cola edición d'un discu recopilatoriu de los 25 años del grupu Dixebra, que contién una ventena de temes, la mayor parte d'ellos versioniaos.

La discográfica, integrada na nueva productora Goxe, ta distribuyendo yá esti trabayu "mui especial", con "un formatu de luxu bien atractivu y orixinal", dao qu'imita a un diariu personal, qu'inclúi escritos sobre la historia del grupu.

La obra ye un repasu per dellos de los momentos y estilos que marcaron el devenir de la formación (punk, rock, reggae, ska, funk, folk o rap). Asina, inclúi versiones de pieces históriques como 'Merucu Xusticieru', 'Canciu d'amor', 'Queda la rabia', 'Vaqueira, remezcles como 'Pal Caribe' o 'Wilma Loulé', y hasta una nueva grabación de 'Nun puxa' --versión de 'God save the Queen', de los Sex Pistols--, con arreglos nuevos y una lletra diferente, escrita pol periodista David Artime.

Amás de los músicos actuales, collaboren na grabación ex componentes, amigos y intérpretes destacaos de la escena asturiana: Isael Sánchez (El Sueño de Morfeo), Rubén Bada, Pablo Carrera (Duerna), Lisardo Prieto (Felpeyu), José Manuel Tejedor, Daniel Álvarez (Corquiéu) o Miguel Herrero, ente otros. Na parte lliteraria, inclúinse testos de Beatriz Redondo Viado (periodista), Miguel Fernandi (músicu), Roberto González-Quevedo (escritor y académicu de la llingua), Xicu Ariza (músicu y periodista) y Pablo Texón (escritor), y un cuentu futurista ambientáu nun conciertu del grupu, obra de David Artime.

Dixebra celebra asina los sos 25 años d'historia, dende'l so primer ensayu, un seis de xineru del añu 1986 nunes cocheres de Castañeda, en Corvera. Nun comunicáu, L'Aguañaz destaca que nestos años dieron infinidá de conciertos per Asturies, l'Estáu y Europa, grabaron diez discos y incluyéronse en recopilatorios abondo.

La discográfica destaca amás "la fidelidá al idioma asturianu", arriendes del so "compromisu social, políticu y llaboral que demostraron dende'l so nacimientu, solidarizándose con munches de les lluches d'esi carácter que se desarrollaron nesta tierra".

De momentu, la única fecha de conciertu que tien fixada'l grupu ye'l próximu 14 d'Abril, na sala Tabú, de Madrid. Sicasí, el vocalista, Xune, informó esti miércoles a Europa Press, qu'antes tienen previsto presentar esti recopilatoriu n'Asturies.