Rodrigo Cuevas, Rigoberta Bandini o Rozalén, ente les más de 4.200 firmes que piden blindar la música n'asturianu

XIXÓN, 5 (EUROPA PRESS)

El refugu de la conceyala de Festexos en Xixón, Sara Álvarez Rouco (Vox), a programar espectáculos que promocionen la oficialidá del asturianu llevó al sector musical a presentar esti miércoles, avaláu por más de 4.200 firmes individuales y colectives, el manifiestu 'Música n'asturianu, sí', y a presentar por Rexistru Municipal una moción por que se blinde l'usu d'esti idioma nel conceyu.

El documentu ta firmáu por artistes de distintes disciplines, dende cantantes a artistes, grupos folclóricos, centros asturianos, bandes de gaites, nomes como Rodrigo Cuevas, Hevia, pero tamién por periodistes, medios de comunicación musicales, sales y chigres con música, entidaes sociales y por artistes de fuera de la rexón, como Rozalén o Rigoberta Bandini, a lo que sumó grupos que van actuar na ciudá esti branu, como Vetusta Morla o Desakato.

Asina lo señaló Leticia Baselgas, que, en nome de la plataforma del sector cultural asturianu, llamentó que se-yos quiera escluyir de los eventos y festexos de la ciudá.

Coles mesmes, calificó como "surrealista" tener que dar respuesta a les declaraciones de la conceyala de Festexos "tan graves", como la de nun querer programar actuaciones n'asturianu, y que nun foron matizaes hasta once díes depués, según ella.

Nesi sentíu, dixo que si la conceyala de Vox acabó "rectificando" foi "pol descontentu social qu'ellos mesmos xeneraron". "Cola rectificación llegó un esperpentu nuevu, el de querer persiguir la llibertá d'espresión de los mesmos artistes", afirmó

Baselgas llamó l'atención sobre qué pasaría si en Cataluña quixeren prohibir actuaciones en castellanu, polo que preguntó cómo ye que se va a poder siguir viendo actuaciones d'artistes que apoyen l'asturianu n'otres ciudaes españoles y n'otros países, pero non en Xixón.

Pa ella, trátase d'un "ataque" qu'afecta a tol sector cultural actúe na llingua qu'actúe, pero n'especial a los que lo faen en llingua asturiana o son falantes de la mesma. A esto sumó que ye "un ataque a la llibertá d'espresión".

Amás, dixo que Vox quier volver a tiempos "d'una censura previa", al determinar que se va programar a un artista o non según la so ideoloxía sobre la oficialidá. "Ye una barbaridá", aseguró Baselgas, que destacó qu'atenta cola llibertá d'espresión que recueye la Constitución Española.

En nome de la mesma plataforma musical y cultural asturiana faló David Varela, qu'alvirtió qu'estes declaraciones "tan graves" de Rouco nun puen quedar "impunes" y nun puen "blanquiar les intenciones discriminatories de los sos socios de Gobiernu" cola carta a la ciudadanía de l'alcaldesa xixonesa, Carmen Moriyón (Foru).

"Queremos que se respeten los nuestros derechos y cumplir les lleis", afirmó Varela, que señaló que necesiten garantíes de que nun se va a materializar lo anunciao por Rouco.

Varela tamién incidió en que, de prohibir la música n'asturianu o de persones a favor de la oficialidá, amás de dir contra la Constitución, tamién s'esfrona con otres normes de protección del asturianu a nivel local y rexonal, como la Llei d'Usu o'l Plan de Normalización de Xixón.

Por eso, van rexistrar una moción al Plenu de Xixón pa que se garantice que pueda haber actuaciones d'artistes y entidaes qu'usen l'asturianu como llingua d'espresión. Mesmo, amás de que lo garantice, que lo afale al traviés de Divertia y de les Conceyalíes de Festexos, Cultura y Educación.

Coles mesmes, esixen nel escritu una declaración de l'alcaldesa na que refugue "contundentemente" les declaraciones y intenciones de Rouco y na que garantice que nun se va aplicar lo que consideren una "vulneración de derechos y lleis".

La plataforma remarca qu'una persona que quier discriminar a una parte de la cultura asturiana nun tien que dirixir la Conceyalía de Festexos. Nesti sentíu, nel so escritu piden el cese de Rouco y que Divertia nun la presida'l so compañeru del grupu municipal, Oliver Suárez.

"Si nun hai una respuesta, pue aumentar la movilización y facese muncho más visible nos espacios públicos esti conflictu, inventáu por Vox", alvirtió Varela.

Esti tamién precisó que nun falaron con nengún grupu municipal, al nun querer vincular la so reclamación con partíos políticos, anque saben que los hai que defenden la llibertá d'espresión y d'ideoloxía nos espectáculos. Amás, dixo tar a disposición d'aconceyar colos que lo soliciten.