El rublu esbarrumba un 27% frente al euru y el dólar depués de les sanciones

MADRID, 28 Feb. (EUROPA PRESS) -

La cotización del rublu nos mercaos de divises nos sos cruces frente al dólar estaounidense y l'euru sufrió dellos esbarrumbes del 27% esti llunes, depués de que nesta fin de selmana anunciaren delles sanciones económiques de les potencies occidentales.

En concreto, dende primer hora de la mañana, la divisa rusa principió una espiral baxista contra'l dólar que llevó al 'billete verde' a trocase por hasta 117,8170 rublos, el so valor mayor desque hai rexistros. Nos últimos díes, el tipu de cambiu llegara a lo más a dalgo mas de 86 rublos ppr dólar.

La evolución del cruce contra l'euru esperimentó una evolución asemeyada. Depués de les primeres hores de cotización, l'euru llegó a trocase por 132,8843 rublos, frente a los 90-93 rublos nos que venía trocándose na última selmana.

El bancu central del país informó'l domingu de que ta capacitáu pa caltener la estabilidá financiera del país a pesar de la conxelación de los sos activos internacionales anunciada na víspora por Estaos Uníos, la Unión Europea, Canadá y Reinu Uníu, nuna de les sanciones más dures recibíes por Rusia desque empezó la so invasión d'Ucraína.

Estes sanciones --que tamién entienden la esclusión de dellos bancos rusos del mecanismu financieru Swift-- paralicen una parte bona de los 600.000 millones d'euros n'oru y divises de l'autoridá monetaria.

Sicasí, depués d'estes sanciones, el Bancu de Rusia anunció una batería de midíes económiques: xuba de tipos al 20%, zarru de la operativa bursátil y controles de capitales pa inversores estranxeros.