La saltadora de pértiga Yelena Isinbayeva, elixida Premiu Príncipe d'Asturies de los Deportes 2009

Reuters

UVIÉU, 02 de Setiembre (EUROPA PRESS)

L'atleta rusa Yelena Isinbayeva ye la galardonada col Premiu Príncipe d'Asturies de los Deprotes 2009, según fizo públicu güei nel Hotel Reconquista d'Uviéu'l Xuráu encargáu de la so concesión. Considerada la meyor deportista de tolos tiempos na so disciplina, Yelena Isinbayeva llogró algamar marques históriques, al tornar na única muyer que superó los cinco metros d'altura en saltu con pértiga, estableciendo un total de 27 récores mundiales.

El xuráu d'esti premiu tuvo presidíu por Juan Antonio Samaranch, marqués de Samaranch, y formáu tamién por José María Abad, Alejandro Blanco, Agustín Castellote, Enrique Castro, María Escario, Misael Fernández Porrón, Julián García Candau, Ignacio Gómez-Acebo, Eduardo Inda, María del Carmen Izquierdo, Javier Jiménez Vaquerizo, Jaime Lissavetzky, José Antonio Luque, Javier Muñoz Gallego, Santiago Nolla Zayas, Josep Pedrerol, José Ramón Pindado, Matías Prats, Julián Redondo, Ángel Rodríguez, Nemesio Rodríguez, José Sámano, José Luis Sánchez-Izquierdo, Arantxa Sánchez Vicario, Orfeo Suárez, José Luis Vilaseca i Guasch, Emma Villacieros e Ignacio Martínez (secretariu).

Según consta nel acta aprobada pol xuráu, n'Isinbayeva recaen les condiciones fundamentales poles que se concede'l premiu y se refieren "amás de la exemplaridá de la so vida y obra, a qu'algamare nueves metes na llucha por superase y contribuyir col so esfuerzu al perfeccionamientu, cultivu o promoción de los deportes".

Asina, el xuráu recordó que Yelena Insinbayeva meyoró en ventisiete ocasiones el récor del mundu en saltu con pértiga, la última d'elles na reciente competición en Zurich, n'onde mostró'l "so espíritu de superación dignu d'allabancia, puesto que llogró la so nueva marca dempués de sufrir la deceición de nun ganar el campeonatu del mundu disputáu en Berlín". Pal xuráu, los llogros de la rusa tornáronla na "meyor deportistas de tolos tiempos na so disciplina".

Yelena Isinbayeva nació en Volgogrado (Rusia) en 1982. Entamó la so carrera deportiva como ximnasata y a los 15 años entamó entrenase na especialidá atlética de saltu con pértiga, na que yá llogró marques históriques, con un total de 27 récores mundiales, 15 al aire llibre y 12 en pista cubierta.

Al entamar la so carrera yá destacó na so primer competición, al algamar los 3,50 metros. En 1998 acudió al Campeonatu del Mundu 'junior' n'Annecy (Francia), onde saltó 4 metros. La so primer medalla d'oru llegó nos Xuegos Mundiales de la Xuventú en 1999, en Bydgoszcz (Polonia), onde algamó los 4,10 metros. Nel añu 2000, nos Mundiales 'junior' en Chile, llogró un saltu de 4,20 metros y l'otru d'estos campeonatos. Esi mesmu añu debutó nos sos primeros Xuegos Olímpicos en Sidney y nel 2001, algamó de nuevo l'oru, con un saltu de 4,40 metros, nos Campeonatos d'Europa junior, celebraos n'Italia.

Los sos primeros grandes éxitos deportivos llegaron nel 2002. A la medalla de plata algamada nos Campeonatos d'Europa de Munich, unióse la d'oru del Campeonatu Nacional del so país en pista cubierta y aire llibre. Nos campeonatos d'Europa sub 23 celebraos nel 2003 en Polonia algamó la medalla d'oru.

Batió la primer vez el récor del mundu nun alcuentru deportivos en Gateshead (Reinu Uníu), con un saltu de 4,82 metros, que la tornó en favorita pa los Campeonatos del Mundu d'atletismu d'esi añu en París, anque quedó en tercer posición. En marzu del 2004 proclamóse campeona del mundu en pista cubierta en Budapest, estableciendo un nuevu récor con un altu de 4,86 metros. Nos meses siguientes, superó la so propia marca en sucesivos alcuentros deportivos hasta saltar los 4,90 metros en xunetu.

Nos Xuegos Olímpicos d'Atenes estableció un nuevu récor mundial y olímpicu, con un saltu de 4,91 que-y valió l'oru. En setiembre d'esi añu, en Bruseles, subió un centímetru'l so propiu récor. En xunetu del 2005 superó otra vuelta la so marca mundial en cuatro ocasiones, en trés competiciones internacionales distintes. Primero en Lausana (Suiza), con un saltu de 4,93 metros, dempués nos Campeonatos d'Europa en pista cubierta de Madrid, onde algamó l'oru co un saltu de 4,95 metros y, a lo último, en Londres, onde algamó los 4,96 metros. Nun saltu posterior, frayó la barrera de los 5 metros, un fechu históricu na historia del deporte, que repitió en Helsinki, al solicitar el llistón en 5,01, cuando yá tenía aseguráu'l títulu.

Nel 2006 algamó la so decimonovena plusmarca, al batir el so propiu récor en pista cubierta nun alcuentru n'Ucraña, onde saltó 4,91 metros, y el títulu européu al aire llibre, en Gotemburgo (Suecia). Esi mesmu añu, na Copa del Mundu d'Atenes, algamó un nuevu oru y nel últimu Campeonatu del Mundu, celebráu en Xapón nel 2007, repitió títulu. Demientres la temporada indoor del 2008, sumó'l so vixésimu primer récor mundial al saltar 4,95 n'Ucraña, y proclamase campeona del Mundu en Valencia.

Na so primera competición al aire llibre de la temporada, en Roma, superó la so meyor marca, fixando'l nuevu rexistru en 5,03 metros, que superó poco dempués en Mónaco, con un saltu de 5,04. Nos Xuegos Olímpicos en Pekín, repitió'l so títulu de campeona olímpica y batió de nuevo la so marca, con 5,05 metros, el so vixésimu cuartu récor mundial. Nel 2009, batió en Donetsk (Ucraña) dos veces la so plusmarca en pista cubierta, que colocó en 5,00, metros, y en Zurich la d'aire llibre, qu'asitió en 5,06. Nel 2004, 2005 y 2008 la Fundación Internacional d'Atletismu (IAAF), elixóla atleta mundial del añu y nel 2007 y el 2009 distinguiéronla col Premiu Laureus a la meyor deportista de la temporada anterior.