La selección de rugby de Nueva Zelanda, Premiu Princesa de los Deportes 2017

Considerada exemplu d'integración racial y cultural, que tresmite valores d'unidá, amistá, solidaridá y deportividá

UVIÉU, 24 de Mayu (EUROPA PRESS)

La selección de rugby de Nueva Zelanda, conocida como All Blacks, resultó galardonada col Premiu Princesa d'Asturies de los Deportes 2017, según fizo públicu esti miércoles n'Uviéu'l xuráu encargáu de la so concesión.

Esta candidatura propúnxola Manuel Pradas Romanina, embaxador d'España en Nueva Zelanda, y Ramón Moreno, director de Casa Asia. Apoyóla Andrew Jenks, embaxador de Nueva Zelanda n'España.

La selección masculina de rugby de Nueva Zelanda, onde esta disciplina ta considerada'l deporte nacional, ye la más representativa de los diez equipos de delles categoríes que la Federación de Rugby d'esti país tien en competiciones internacionales. Creada en 1893, la selección disputó'l so primer partíu internacional en 1903 contra Australia en Sídney y, en 1905, realizó una xira peles Isla Britániques.

Tornada nun iconu d'esti deporte en tol mundu, la selección neozelandesa tamién ta considerada exemplu d'integración racial y cultural, que tresmite valores d'unidá, amistá, solidaridá y deportividá.

CAMPEONA EL MUNDU

Vixente campeona del Mundu, Nueva Zelanda ye'l combináu nacional más galardonáu de la historia d'esti deporte al contar nel so palmarés con trés títulos (1987, 2011 y 2015) de los ocho Mundiales disputaos hasta la fecha, siendo l'únicu equipu que repite títulu mundial consecutivu y que tien récor de victories frente al restu de selecciones nacionales.

Dende'l so debú internacional de 1903, namás Australia, Inglaterra, Francia, Suráfrica y Gales ganaron a Nueva Zelanda en partíu oficial. Con un porcentaxe de victories del 76%, la selección neozelandesa asitióse ente los equipos más esitosos de cualquier deporte. Dende que la Federación Internacional, actual World Rugby, creó nel 2003 la clasificación mundial, Nueva Zelanda, qu'ocupa nesti momentu'l primer puestu, encabezó esta llista en más del 80% del tiempu. Nel 2014 estableció un finxu al liderar el ranking mientres cinco años sin interrupción. Nueva Zelanda compite añalmente con Arxentina, Australia y Suráfrica en The Rugby Championship, conocíu como Tornéu de les Trés Naciones hasta la inclusión de la selección suramericana nel 2012

De les 21 ediciones d'esti tornéu, Nueva Zelanda ganó en catorce ocasiones, con unes estadístiques bien superiores a los sos rivales. Llogró un Grand Slam -cuando una selección del hemisferiu sur gana nuna xira a Inglaterra, Irlanda, Escocia y Gales- en cuatro ocasiones (1978, 2005, 2008 y 2010).

Dende los entamos del rugby en Nueva Zelanda, esti deporte ta vinculáu a la haka -danza tribal maorina de desafíu-, qu'interpreten los xugadores sobre'l terrenu de xuegu antes del entamu de cada partíu internacional y que tornó n'una de les señes d'identidá del equipu nacional.

L'EQUIPU

La selección actual está dirixida pol técnicu Steve Hansen ya integrada por los delanteros Ardi Savea, Brodie Retallick, Charlie Faumuina, Codie Taylor, Dane Coles, Elliot Dixon, James Parsons, Jerome Kaino, Joe Moody, Kane Hames, Kieran Read, Liam Coltman, Liam Squire, Luke Romano, Matt Todd, Nathan Harris, Ofa Tu'ungafasi, Owen Franks, Patrick Tuipulotu, Sam Cane, Samuel Whitelock, Scott Barrett, Steven Luatua y Wyatt Crockett y los trés cuartos Aaron Cruden, Aaron Smith, Anton Lienert-Brown, Beauden Barrett, Ben Smith, Charlie Ngatai, Damian McKenzie, George Moala, Israel Dagg, Julian Savea, Lima Sopoaga, Malakai Fekitoa, Rieko Ionae, Ryan Crotty, Seta Tamanivalu, Tawera Kerr-Barlow, T.J. Perenara, y Waisake Naholo.

La selección de Nueva Zelanda ta designada por World Rugby, el máximu organismu internacional d'esti deporte, como meyos equipu del año diez veces (2005, 2006, 2008, 2010, 2011, 2012, 2013, 2014, 2015 y 2016). Nel 2016 recibió'l Premiu Laureus al meyor equipu del añu.