Publicado 18/05/2021 15:45CET

La Selmana de les Lletres próxima va rindir homenaxe al dibuxante y músicu Ígor Medio

Viñeta de La familia Castañón, de Ígor Medio
IGORMEDIO.COM

UVIÉU, 18 May. (EUROPA PRESS) -

La conseyera de Cultura, Política Llingüística y Turismu, Berta Piñán, anunció esti sábadu en Cangas que la Selmana de les Lletres Asturianes próxima va rindir homenaxe al dibuxante y guionista de cómic, y músicu, Ígor Medio. L'artista xixonés, fináu nun accidente de carretera en 2006, cumpliría los 50 años en 2022.

Piñán realizó l'anunciu na so intervención na apertura de la Selmana de les Lletres de Cangas, na que participó xunto al alcalde del conceyu, José Víctor Rodríguez. La conseyera de Cultura adelantó tamién que'l programa de la edición de la Selmana de les Lletres próxima va xirar alredor de les actividaes artístiques nes que destacó Ígor Medio: el cómic y la música.

Con anterioridá a adelantar el nome de quien va recibir l'homenaxe na 43 Selmana de les Lletres, la conseyera de Cultura quixo destacar la importancia de la cita cultural de Cangas, recordó la "fonda y rica tradición lliteraria del conceyu" y resaltó "el trabayu que'l Serviciu de Normalización Llingüística llevó a cabu mientres munchos años pol suroccidente asturianu".

Piñán, qu'incidió na importancia qu'alcuentros como'l de Cangas "tienen pa la cultura y la llingua asturianes", fixo una valoración curtia de l'apocayá clausurada 42 Selmana de les Lletres Asturianes dedicada al polifacéticu artista Nel Amaro.

La conseyera destacó que la reivindicación del escritor mierense valió pa divulgar ente les xeneraciones nueves la figura d'un nome esencial na historia recién de cultura asturiana. "La divulgación y l'homenaxe xuntos otorguen un valor añadíu a los alcuentros culturales", dixo.

HOMENAXE A ÍGOR MEDIO

Ígor Medio (1972-2006) realizó cola so obra una contribución esencial al cómic n'Asturies, creando mundos que tovía perviven nel imaxinariu colectivu, ente los que destaca la Familia Castañón. La Selmana de les Lletres Asturianes va xirar alredor del creador xixonés, y van tener especial protagonismu na so programación el cómic y la música.

Esta va ser la primer vez que la Selmana se celebre alredor d'un autor d'esti xéneru, amás de ser la primer vez qu'una persona nacida na década de los 70 del sieglu pasáu reciba l'homenaxe de les Lletres Asturianes.

Ígor Medio, nacíu nel barriu xixonés d'El Natahoyo, estudió Belles Artes en Salamanca, collaboró en fanzines y revistes como El Llapiceru, El Wendigo o Esquit. Foi tamién responsable de cómics de sonadía, como Love Gun, y creador de personaxes gráficos como Anselmo Ensombras, Little Memo o la emblématica familia Castañón, xente llanu de Xixón, protagonista d'una tira cómica que se publicó ente 1997 y 2005 nel suplementu de branu del diariu La Nueva España.

En 1991, Ígor Medio fundó xunto al percusionista y compañeru d'estudios Ruma Barbero'l grupu de folk Felpeyu, que col tiempu diba convertise nun referente de la música asturiana. En Felpeyu, Ígor Medio tocó la guitarra y la mandolina, pasando depués al bouzouki como instrumentu principal, y foi tamién la voz del grupu y l'arreglista fundamental hasta'l so fallecimientu.

L'artista xixonés desenvolvió tamién un intensu trabayu como productor de discos d'artistes y grupos asturianos como Flavio Rodríguez, Gatos del Fornu o Tejedor, grupu del que tamién formó parte. En 2003 punxo en marcha'l sellu editorial Tierra, nel qu'apaecía'l so llibru recopilatoriu de la familia Castañón, Too Castañón.

Ígor Medio finó en 2006 nun accidente de carretera nel que tamién morrió Carlos Redondo, compañeru en Felpeyu, cuando'l grupu viaxaba a Barcelona p'actuar. Dambos taben collaborando naquel momentu na grabación del discu Keltikhé, del compositor Ramón Prada, una "cantanta pa voces celtes y orquesta" encargada pol Festival Intercélticu de Lorient.

Asturianu ofrecido por