UVIÉU, 6 May. (EUROPA PRESS) -
La Conseyería de Cultura, Política Llingüística y Turismu anunció güei que la 41 edición de la 'Selmana de les Lletres Asturianes' va celebrase del 28 de setiembre al 2 d'ochobre. Precisamente, el Día de les Lletres va ser el 2 d'ochobre.
La Dirección Xeneral de Política Llingüística, d'alcuerdu cola Academia de la Llingua Asturiana (ALLA), decidió aplazar la celebración institucional de les Lletres Asturianes el 20 de marzu, pol decretu del estáu d'alarma y el confinamientu pola crisis del coronavirus. Coles mesmes, l'ALLA optó tamién por retrasar hasta la seronda'l Día de les Lletres Asturianes, que por tradición tendría que celebrase esti vienres.
La fiesta de la lliteratura n'asturianu y en gallego-asturianu, que se convoca anualmente dende 1980, tendría qu'entamase esta selmana. Nesta edición, la Conseyería decidió dedicar la Selmana a recuperar la figura de l'autora maliaya María Teresa Villaverde, Tuxa (1882-1934), una escritora del Rexonalismu de la primer metá del sieglu XX, poeta, narradora y dramaturga.
Del 28 de setiembre al 2 d'ochobre, la 'Selmana de les Lletres' va reivindicar la so figura col lema 'Tuxa, sentimientu y tradición', y va recuperar nuna publicación la so obra. Tambien va facese un vídeu sobre la so persona y l'entornu cultural y social nel que trabayó.
Ente otros actos de la programación, destaca la celebración, el 2 d'ochobre, del Día del Llibru Asturianu, nel que collaboren les principales llibreríes d'Asturies.
Per otru llau, l'Academia de la Llingua Asturiana va programar la entrega del II Premiu Nacional de Lliteratura al escritor Xuan Xosé Sánchez Vicente nun actu institucional con carauterístiques estremaes a les avezaes nel Teatru Campoamor, axustáu al contestu preventivu d'anguaño.
