Sindicatos alverten que van trabayar nuna Fuelga Xeneral si nun s'avanza en derechos llaborales

UVIÉU, 23 Abr. (EUROPA PRESS) -

El secretariu xeneral de CCOO d'Asturies, José Manuel Zapico, y el secretariu xeneral d'UXT, Javier Fernández Lanero, alvirtieron esti llunes que van empezar a trabayar nuna Fuelga Xeneral si'l Gobiernu "nun toma midíes" sobre los salarios, les pensiones, la resquiebra salarial y la siniestralidá llaboral.

Dambos sindicatos convocaron la movilización pal 1 de mayu, con motivu del Día del Trabayador, que va celebrase a les 12.00 hores en Llangréu. La salida va ser nel Parque Vieyu y la llegada ta prevista al Parque Doráu. El lema d'anguaño ye 'Tiempu de ganar'.

José Manuel Zapico afirmó que "va haber repartu o conflictu". El secretariu xeneral aportunó en qu'España salió de la crisis económica pero eso nun se reflexa nos salarios de los trabayadores. Asina, encamentó a que se produza una xubida xeneralizada de los salarios en tolos convenios colectivos del 3,1 por cientu. "Naide tendría que vivir con menos de 1.000 euros, nin pensionistes nin trabayadores", aseguró Zapico.

Amás, piden un sistema públicu de pensiones y "non más retayos". Per otru llau, esixen la derogación de la reforma llaboral que traxo, según ellos, "desigualdá" y "precariedá". A lo último, nun escaecen a les muyeres y les reivindicaciones del 8 de marzu. "Queremos midíes concretes contra la resquiebra salarial", alvirtieron.