La tercer entrega del discu de 'Bestiariu' llega a les tiendes

LA FABRIQUINA.

UVIÉU, 19 Dic. (EUROPA PRESS) -

30 grupos y artistas repartíos en trés discos son los qu'axunta yá con esta nueva entrega'l proyectu de 'Bestiariu'; una producción de La Fabriquina que busca axuntar a la familia alredor de la música fecha n'Asturies, averar l'asturianu al públicu infantil y crear nuevos materiales orixinales pa los neños y neñes nesta llingua. Nesti nuevu discu, los animales siguen siendo'l filu conductor y la sida pola que'l públicu infantil s'avere a los distintos estilos musicales que formen el panorama musical d'Asturies anguaño.

Asina, al traviés d'una perra sideral, un cocu que ye'l terror del llagar, un esperteyu o una lleona vasca que conoz a un gatu asturianu, los neños y neñes pueden esfrutar de les propuestes de destacaos grupos de la escena independiente, folk y rock de la nuestra comunidá como Losone, Buen Suceso, La Tarrancha, El koku la manzana, Nosoträsh, Lorena Álvarez, L-R, Antón Menchacha, Rioturbio, San Jerónimo y Muga y el Corín de Reciella. N'ediciones anteriores collaboraron grupos como Dixebra, Nacho Vegas, Felpeyu, Paulineen la Playa o Skama la rede.

'Bestiariu 3' volvió ser ilustráu pol reconocíu diseñador Marco Recuero, que yá s'encargó del arte de los dos anteriores álbumes, y grabóse en dellos estudios asturianos. Amás, nesta edición inclúyense delles sorpreses: ente elles un tema na otra llingua d'Asturies, el gallego-asturianu, compuestu por Lorena Álvarez y dedicáu a la curuxa y el regresu de Nosoträsh tres dellos años alloñaes de los estudios.

El discu sal a la venta esti 20 d'avientu y la so presentación en directu va ser dientro del Ciclu Escenines entamáu por Reciella, nuna sesión mañanera nel Salón d'Actos del C.P Xovellanos de Xixón, el sábadu 30 d'avientu a les 12.00 hores con entrada de baldre hasta completar aforu.