UVIÉU, 23 Oct. (EUROPA PRESS) -
La Televisión del Principáu d'Asturies (TPA) emite esti miércoles a les 23.45 hores el clásicu del cine de los ochenta 'Los Goonies'. Estrenada en 1985 y basada nuna historia de Steven Spielberg, trátase d'una película de cultu que va poder vese con un doblaxe al asturianu.
Dirixida por Richard Donner, la película fala d'una banda de preadolescentes que vive nel barriu de Goon Docks, n'Astoria, Oregón, que traten de salvar los sos llares de ser baltaos. Por casualidá atopen un mapa español antiguu que los lleva a la gueta de l'ayalga de Willie'l tuertu, un pirata del sieglu XVII.
El doblaxe al asturianu de 'Los Goonies' estrenóse el 8 de setiembre, Día d'Asturies, del 2017 y ye l'últimu doblaxe fecho a costafecha pa TPA nel nuestru idioma.
Les otres películes n'asturianu emitíes pela cadena hasta la fecha foron 'El rostru impenetrable' (Marlon Brando, 1961), 'Harry el suciu' (Don Siegel, 1971), 'Greystoke' (Hugh Hudson, 1984), 'Orixe' (Christopher Nolan, 2010), 'Ocean's Eleven' (Steven Soderbergh, 2001), y 'Sherlock Holmes: xuegu de solombres' (Guy Ritchie, 2011), amás del doblaxe de la serie infantil d'animación 'Los bolechas'.
