TPA emite pola Selmana de les Lletres un documental sobre Ígor Medio y l'adaptación televisiva de 'Hansel y Gretel'

UVIÉU 3 May. (EUROPA PRESS) -

TPA va emitir, con motivu de la 43 Selmana de les Lletres Asturianes, el documental 'Onde soi quien quiero ser', sobre la figura d'Ígor Medio, y la versión televisiva de l'adaptación al asturianu de la obra de teatru de 'Hansel y Gretel'.

La Selmana va desenvolvese dende'l martes 3 y va centrase na obra del músicu y dibuxante Ígor Medio. Por eso, en TPA, amás de les pieces diaries de los programes informativos, va haber una programación especial. Amás, en RPA van emitise 20 espacios dedicaos a esti acontecimientu.

Esti martes 3 de mayu, a les 23.15 hores va emitise'l documental 'Onde soi quien quiero ser. Una semblanza d'Ígor Medio', mentes que'l xueves 5 de mayu a les 23.45 y con pieces diaries de llunes a vienres a les 15.15, 'Pieces' dedica un programa especial a la Selmana de les Lletres Asturianes.

Otra manera, el vienres, 6 de mayu, a les 12.00 hores y dende'l Teatru Filarmónica, RTPA emite en directo l'actu de l'Academia de Llingua pol Día de les Lletres Asturianes.

Yá el sábadu, a les 9.00 hores, va emitise l'adaptación televisiva de 'Hansel y Gretel', na versión teatral pa públicu infantil y familiar de la compañía xixonesa Higiénico Papel Teatro, qu'algamó'l Premiu Nel Amaro na so segunda edición.

P'acabar, el domingu, 8 de mayu, a les 23.00 hores va emitise'l conciertu homenaxe a Ígor Medio nel Teatru de la Llaboral, cola participación de los grupos Felpeyu, y integrantes de Tuenda, DRD, La Bandina'l Tombo y Corquiéu, acompañaos por José Manuel Tejedor,
Mapi Quintana, Bree Delian, Alberto Sánchez, Xuan Nel Expósito, Cástor Castro, Félix Castro, Toño Gómez, Xel Pereda y Isidro Suárez.