Tres deteníos por estafar a futbolistes mozos estranxeros con falses promeses d'establecese nel fútbol español

UVIÉU 22 Ago. (EUROPA PRESS) -

La Policía nacional detuvo a tres persones por delitos contra los derechos de los trabayadores y de los ciudadanos estranxeros. Los deteníos estafaben a futbolistes mozos estranxeros con falses promeses d'establecese nel fútbol español.

La investigación tien el so entamu en xunu del 2025, cuando la Policía Nacional recibe información sobre la situación na que taríen vivendo dellos mozos arxentinos, que seríen captaos nel so país d'orixe cola falsa promesa d'establecese formalmente n'España como futbolistes. A partir d'esi momentu, funcionarios de la Brigada Provincial d'Extranxería y Fronteres de la Xefatura Superior de la Policía Nacional n'Asturies, alcuentren y tomen declaración a un total de seis perxudicaos.

Tolos testimonios coincidieron na implicación d'un conocíu axente de futbolistes arxentín, como la persona que captaba a mozos naquel país pa ufierta-yos un proyectu deportivu n'Asturies, qu'incluyía agospiu, mantención, entrenador personal, nutricionista y collaboración con un club de fútbol pa establecese n'España per aciu d'un visáu d'estudios y la busca d'un emplegu.

Una vegada captaos los mozos, l'axente axuntábase cola familia del xugador pa convence-yos del proyectu y entaina-yos al abonu d'un anticipu de 1.000 euros, yá que, según dicía, había places llimitaes. El costu total del programa rondaba ente los 3.000 y 4.000 euros según el casu, teniendo qu'abonar el restu del dineru cuando llegaren a Asturies a otru de los implicaos y fíu del axente.

Amás del pagu pol proyectu, teníen qu'abonar los gastos del viaxe dende Arxentina. Pa que nun tuvieren problemes nel control de fronteres, los perxudicaos yeren instruyíos pa qu'asemeyaren un viaxe de turismu, incidendo en que nun teníen de facer referencia al proyectu deportivu.

Cuando los futbolistes llegaben a Asturies, yeren recoyíos por otros miembros de la trama y derivaos a un albergue o a un pisu, propiedaes ambes del presidente d'un club modestu, pero conocíu de fútbol asturiano, que les sos condiciones nun se correspuendíen colo ufiertao, col perxuiciu de tener qu'abonar gastos pol agospiu.

La realidá que s'atoparon foi que, n'abonando altes cantidaes de dineru, solamente se-yos ufiertaba mantención y un entrenador que preparaba entrenamientos nes instalaciones del club asturianu colos pocos xugadores que yeren, teniendo que completar la xornada con otros xugadores amateurs de la zona.

Les víctimes apenes xugaron partíos de preparación nin participaron en pruebes pa fichar por dalgún club. Tampoco se-yos tramitó visáu d'estudios dalgunu que-yos dexara vivir y trabayar, polo que dalgunos se quedaron n'estancia irregular y ensin medios de vida.

Realizaes les xestiones d'investigación, llográronse inicios que sofiten les declaraciones de los perxudicaos, polo que se procedió a la detención de dos persones de nacionalidá arxentina (al fíu del axente de futbolistes y al entrenador) y a otra persona de nacionalidá española (directivu d'un club de fútbol asturiano) como responsables de dar soporte al falsu proyectu deportivu.

L'ideólogu del proyectu atópase anguaño n'Arxentina pendiente de llocalización. Los fechos fueron puestos en conocimientu de la Fiscalía del Principáu d'Asturies y del Xulgáu de primera Instancia y Instrucción de La Pola L.lena.

La Policía Nacional sigue con xestiones pal esclarecimientu de los fechos y llocalización d'otros perxudicaos. Coles mesmes, al traviés de los mecanismos de cooperación policial internacional, púnxose en conocimientu de la Policía Federal arxentina y, al traviés de la Fiscal de Sala Coordinadora de la Fiscalía Xeneral del Estáu, como puntu de contactu focal, pal so treslláu a la REDTRAM (Rede Iberoamericana de Fiscales Especializaos en Trata de Persones y Tráficu Ilícitu de Migrantes), constando que por parte de la Fiscalía d'Arxentina abrióse dilixencies d'investigación.