Túnez impón l'estáu d'escepción y amenaza con "usar les armes"

TÚNEZ, 14 de Xineru (Reuters/EP)

El Gobiernu de Túnez declaró l'estáu d'escepción en tol país, impunxo un toque de queda ente les cinco de la tarde y les siete de la mañana, según informó la televisión estatal. Coles mesmes, prohibió la formación de grupos de más de trés persones y alvirtió que se van utilizar "armes" si nun s'atiende a les ordes de les fuerces de seguridá.

"El presidente ordenó al primer ministru, Mohamed Ghannouchi, la formación d'un nuevu Gobiernu", informó la televisión. "Tres los actos de violencia, decidió introducir l'estáu d'escepción nel país pa protexer a los ciudadanos tunecinos", prosiguió.

"Esti estáu d'escepción supón que que queda prohibida cualquier xunta de más de trés persones, que les fuerces de seguridá van utilizar les armes en casu de que los sospechosos nun se detengan cuando lo pida la Policía y que se va imponer un toque de queda dende les cinco de la tarde hasta los siete de la mañana por un periodu indefiníu", añadió.

El presidente de Túnez, Zine al Abidine Ben Ali, decidió destituyir a tol so Gobiernu y convocar elecciones lexislatives pa dientro de seis meses, dempués de delles selmanes de protestes populares contra la corrupción, el paru y los altos precios de los alimentos.

Les movilizaciones algamaron el so puntu culminante esti vienres con una manifestación de miles de persones ante la sede del Ministeriu del Interior pa reclamar la dimisión inmediata del presidente, pese a qu'ésti se mostrara dispuestu a celebrar elecciones lexislatives antes de les presidenciales del 2014 y a nun cambiar la Constitución pa poder optar a la reelección. La Policía disparó gases llarimosos y sintiéronse disparos.

Según les organizaciones de Derechos Humanos, polo menos 60 persones morrieron a lo llargo d'estes últimes selmanes por causa de les protestes rexistraes en tol país. Trece d'elles morrieron esta pasada nueche na capital, Túnez, y otros cinco morrieron esti vienres nel entornu de la ciudá.