La Universidá d'Uviéu recupera'l primer atles modernu de la hestoria del que solo hai dos exemplares n'España

   UVIÉU, 23 Abr. (EUROPA PRESS) -

   La Universidá d'Uviéu presentó esti miércoles, con motivu del Día Internacional del Llibru, el consideráu primer atles modernu, el 'Theatrum Orbis Terrarum', un exemplar únicu del sieglu XVII que foi apocayá restauráu y atópase en un fondu históricu de la institución académica.

   Trátase d'una obra del xeógrafu y cartógrafu flamencu Abraham Ortelius, editáu en 1609 -la primer edición data de 1570- y que perteneció al legáu del Conde de Toreno, considerada la más completa y de la que solo esiste otru exemplar n'España, en Granada.

   El director de la Biblioteca, Fausto González, esplicó qu'el que fora'l xeógrafu oficial de Felipe II foi'l ceador de la primer edición del atles que constaba de 70 mapes que nun fueron ellaboraos por él, sinón que recurrió a los meyores mapes d'otros xeógrafos de la so dómina citándolos per primer vegada, daqué que nun yera frecuente. "Unificó los mapes pa que tuvieren una estructura común y xunilos n'una obra con un orde lóxicu y estableciendo la forma d'atles que se sigue utilizando na actualidá", esplicó.

   Trátase d'una obra que tuvo gran impactu na so dómina y que tuvo munches ediciones y traducciones a idiomes modernos ya que primeramente publicose en llatín. Anque Ortelius finó en 1598, realizáronse ediciones más ampliaes, añediendo más mapes y conocencies, pasando de los 70 a un total de 169 mapes.

   "Ta casi completu, solo falten una media docena, daqué que nun ye frecuente nestes obres xeográfiques dáu'l valor que tien individualmente cada mapa. Yera frecuente que col pasu de los años fueren arrincaos o vendíos n'Internet", detalló González. Axunta n'un mesmu tomu'l cuerpu principal de la obra, un apéndiz con mapes históricos, bíblicos y mitolóxicos, y un nomenclátor.

   La vicerrectora d'Investigación, Irene Díaz, que tamién tuvo na presentación del atles, destacó'l doble papel de la Biblioteca Universitaria tantu como guardiana d'un valiosu fondu históricu, como nel so papel de pilar fundamental pa informar a la comunidá universitaria y dar a conocer les investigaciones que se desenvuelven nel so senu.