URA diz que Conseyería, Asaja, COAG y UCA tienen d'asumir responsabilidaes pola chambonada cola IGP

   UVIÉU, 25 Jul. (EUROPA PRESS) -

   Unión Rural Asturiana, URA, amosóse esti vienres bien críticu cola polémica na IGP Tenral Asturiana y indicó que tanto la Conseyería de Mediu Rural como los sindicatos Asaja, COAG y UCA tienen qu'asumir responsabilidaes na chambonada de xestora na IGP.

   Los mesmos sindicatos que s'oponen inclusive judicialmente a la celebración d'elecciones nel campu, participaron xuntu col Gobiernu na imposición d'una xestora pa que tampoco hubiera elecciones na IGP. Esiximos la inmediata asunción de responsabilidaes polítiques per parte de los que adoptaron asemeyada decisión contraria a los derechos fundamentales y más propios d'una dictadura que d'un estáu de derechu, indiquen dende URA.

   Recuerda la organización agraria que'l tiempu vuelve da-yos la razón, en referencia a anulación per parte de la Sala de lo Contenciosu Alministrativu del Tribunal Cimeru de Xusticia d'Asturies de la xestora de la IGP que'l Gobiernu del Principáu alcordó y impunxo n'estrecha collaboración con UCA, Asaja y COAG, y en contra de les decisiones de la Xunta Electoral del conseyu regulador.

   Consideren amás que ye inaceptable que dende un gobiernu roben el derechu a escoyer a los representantes d'una marca referente como ye Tenral Asturiana y añeden que por si fora poco nun ye la primer vegada d'una intrusión de caláu.

   Dende URA inciden en que sofiten firmemente la candidatura encabezada pol ganaderu Fernando Martínez Barbón y faen un llamamientu a los socios de la IGP a que nes próximes elecciones dean una respuesta similar a la dada nes elecciones agraries.