Actualizado 07/11/2018 16:34

La XDLA diz que l'informe contra les ordenances d'Avilés muestra la "necesidá" d'oficializar l'asturianu

Manifestación por la oficialidad del asturiano en Oviedo
EUROPA PRESS - Archivo

UVIÉU, 7 Nov. (EUROPA PRESS) -

La Xunta pola Defensa de la Llingua Asturiana (XDLA) afirma que la noticia de que'l Conceyu d'Avilés nun va siguir alantre cola tramitación d'una ordenanza d'usu del asturianu muestra la "necesidá" de facer oficial esti idioma.

Al traviés d'una nota de prensa, la organización posicionóse sobre l'informe desfavorable de los servicios xurídicos del Conceyu a aprobar unes ordenances, dalgo que pa la XDLA "nun fai más que recordar la necesidá d'un marcu llegal que garantice polítiques actives y clares en favor de la normalización del idioma".

"Esi marcu nel Estáu español nun ye otru que la oficialidá", diz la entidá, qu'afirma qu'a pesar d'eso "puen facese polítiques más modestes de promoción del asturianu, como les que se vienen faciendo hasta agora nos conceyos y na Alministración autonómica, ensin que los enemigos acérrimes de l'ampliación de derechos pa la ciudadanía tengan que tachales d'illegales, como ye'l casu de los autores d'esi informe xurídicu d'Avilés".

La XDLA diz que l'informe nun tien apoyu xurídicu y recuerden qu'hai conceyos, como Xixón o Llaviana, que tienen aprobaes unes ordenances "avalaes pola Llei d'Usu y Promoción del Asturianu de 1998".

Con too, espliquen que col informe queda demostrao que'l marcu llexislativu actual del asturianu "ye insuficiente pa garantizar que nun haya interpretaciones xurídiques, por mui torpes o poco fundamentaes que seyan, qu'avalen la inacción de los nuestros responsables políticos".

"La oficialidá ye l'únicu camín que garantiza que los Conceyos puedan actuar con autonomía nuna actividá tan normal como favorecer l'usu de la llingua propia y, por supuestu, pa que la ciudadanía que quiera pueda usar l'asturianu ensin problema", sentencien.

Asturianu ofrecido por