La XDLA: "Nesti procesu de reforma estatutaria va demostrase qu'hai una mayoría rotunda a favor de la oficialidá".

UVIÉU, 10 May. (EUROPA PRESS) -

La Xunta Pola Defensa de la Llingua quixo dexar "bien claro" esti sábadu que "nun van parar". "Nesti procesu de reforma estatutaria, anque nun cuaye, na Xunta Xeneral va demostrase qu'hai una mayoría rotunda a favor de la oficialidá. Por desgracia, nesto la derecha asturiana vuelve dir de la manina colo peor de la intolerancia y la reacción ultra. Los votos de la negación van torgar lo que va años tenía que tar llograo y resuelto".

Asina lo recoyía'l manifiestu lleíu pola presidenta de la XDLA, María Xosé Martínez nel que se sollertó tamién de los tiempos complicaos que faen más necesariu que nunca caltenese xuntes na reivindicación, sollertes na llucha y concentraes nos oxetivos de la oficialidá y los derechos llingüísticos".

Recuerda la XDLA que la oficialidá vuelve tar enriba la mesa de la Xunta Xeneral cola reforma del Estatutu d'Autonomía, como tuvo en llexislatures anteriores y eso "tien que ser razón d'arguyu para tol movimientu reivindicativu". Sicasí añedió que "por desgracia la derecha asturiana vuelve dir de la manina colo peor de la intolerancia y la reacción ultra".

"Los votos de la negación van trabar lo que va años tenía que tar llográu y resueltu", llamenten el defensores de la oficilidá, que garré tou incidieron en que "nesti procesu de reforma estatutaria, anque nun cuaye, na Xunta Xeneral va demostrase qu'hai una mayoría atayante a favor de la oficialidá".

Tamién la XDLA tuvo crítiques pal Gobiernu asturianu y llamentó que munches vegaes, los mesmos que dicen defender nes instituciones la oficialidá son quien dempués nun faen nada nos espacios onde se puede visibilizar l'usu normal de les nueses llingües y onde puen asegurase derechos.

"N'Asturies paez que quieren qu'en los conformemos col usu del asturianu, namás en fiestes de guardar. Basta con mirar pa la programación de la RTPA d'esta Selmana de les Lletres", llamentaron, para criticar tamién la situación del asturianu na enseñanza pública.

Y ye que al so xuiciu la situación na enseñanza y nos medios de comunicación nunca se ve qu'ameyore. "Vivimos instalaos nos años 80 de contino. La marxinación y el voluntarismu siguen siendo lo único esperable nesos ámbitos", llamentaron.

DAMIÁN BARREIRO, UN EXEMPLU A SIGUIR

Tou ello nun manifiestu nel que se recordó a Damián Barreiro, periodista y compañeru d'Europa Press fináu'l pasáu mes de febreru.

"Va unos díes recordemos nun actu n'Avilés la vida y el llabor del compañeru Damián Barreiro, col que tuvimos la suerte de tar años a comuña na reivindicación d'una Asturies más digna y meyor. Vamos Siguir el so exemplu, un exemplu de trabayu y de compromisu por que cada unu pueda vivir y falar na llingua que quiera, y por que pueda facer en llibertá y con tolos derechos", destacó Martínez.

Esti manifiestu lleóse dempués de que la manifestación convocada pola Xunta percorriera les principales cais d'Uviéu pa reclamar la oficialidá del asturianu. La manifestación salió de la Estación del Norte d'Uviéu a les 12.00 hores y travesó la cai Uría p'acabar na Plaza de La Escandalera, onde tres la llectura del discursu cuntóse cola actuación del grupu 6 Riales.