Afirmen que dedicar una partida de Política Llingüística pa TPA ye actuar como si fora un mediu priváu qu'emite en castellanu
UVIÉU, 29 Nov. (EUROPA PRESS) -
La Xunta pola Defensa de la Llingua Asturiana (XDLA) afirma que la RTPA tien ser, "como marca la llei", una parte activa nel "procesu de recuperación del patrimoniu llingüísticu del país". Por eso, critiquen que dientro del proyectu de presupuestos, nel apartáu de promoción del asturianu, dediquen una partida de 70.000 euros pa la cadena y soliciten a la Conseyería d'Educación y Cultura qu'esixa a la dirección de los medios públicos qu'esa partida se dedique "íntegramente al doblaxe de dibuxos animaos n'asturianu".
Al traviés d'una nota de prensa, la organización cívica posicionóse sobre'l proyectu de presupuestos pa 2018, que dientro de la partida de la Conseyería d'Educación y Cultura conseña 70.000 euros pa la promoción del asturianu en RTPA. La XDLA señala que RTPA yá recibe 23 millones d'euros al traviés de la Conseyería de Presidencia, "polo que dar esa partida de 70.000 euros ye dir contra l'Estatutu, la Llei d'Usu y la mesma llei de creación de RTPA".
Pa la organización, conceder esti presupuestu ye actuar como si RTPA fora un mediu priváu. "Ye dar por fechu que ye una cadena en castellanu y que pa facer daqué n'asturianu hai que poner perres", indiquen. Amás, critiquen que na memoría d'oxetivos de RTPA pal 2018, incluida nos presupuestos, nun haya nenguna referencia a la promoción del asturianu y que se diga que RPA yá divulga la llingua asturiana "cuando namás emite diez minutos de llunes a vienres".
"RTPA yá tien 23 millones de presupuestu y si con esa cantidá hai perres pa facer programes en castellanu y, sobre too, pa pagar a los directivos nuevos qu'entraron esti añu, tamién tien qu'haber presupuestu pa facer programes n'asturianu", señalen. Asina, la XDLA diz que nun tien sentíu dar perres a una televisión que por llei yá tien qu'emitir n'asturianu, "pero que ta dirixida por xente que se niega a desenvolver la llexislación vixente y, mesmo, a usar la toponimia oficial asturiana".
Por esto, la organización solicita a la Conseyería d'Educación y Cultura "qu'esixa" a la dirección de RTPA que los 70.000 euros se dediquen al doblaxe de dibuxos animaos n'asturianu. "Sería la manera meyor d'actuar sobre un sector estratéxicu pal futuru del nuestru idioma; la mocedá". Pa llevalo alantre, la XDLA quier que se firme un conveniu ente Conseyería y RTPA pa supervisar el doblaxe y los conteníos a emitir, "dalgo que podría ser el güañu pa la creación del Serviciu Asturianu de Doblaxe".
Asina, indiquen, abría unes "garanties" d'en que se van gastar esos 70.000 euros y podríen afitase unos "criterios claros de calidá y continuidá" pa dar 70.000 euros más "a Antonio Virgili", una persona que según la XDLA lleva años incumpliendu la llei y dirixendo la radiotelevisión pública "como'l so güertu particular".
