Xigantes como Google o Meta tendrán de llimitar al conteníu illegal y la desinformación na UE dende güe

BRUXELES, 25 (EUROPA PRESS)

La Llei de Servicios Dixitales (DSA) va ser llegalmente aplicable dende esti vienres, 25 d'agostu, pa les 19 plataformes y motores de busca con más de 45 millones d'usuarios na Unión Europea -equivalente a un 10% de la población d'Europa--, tales como Google, Meta (la matriz de Facebook o Instagram), X (antes Twitter) o TikTok, ente otros, lo qu'implica que tendrán de cumplir coles disposiciones más estrictes de la normativa, qu'obliga a tomar midíes contra conteníos illegales espublizaos n'Internet y llimitar la desinformación online.

La llista de 'xigantes' online inclúi tamién a plataformes como Amazon o Zalando, que presentaron sendos recursos énte'l Tribunal de Xeneral de la UE la decisión de la Comisión, yá que consideren que nun s'axusten a esta definición y busquen evitar que se-yos aplique la normativa de la nueva llei.

La batería de midíes de la nueva llei obliga dende esti vienres a les grandes plataformes y motores de busca qu'operen na UE a establecer términos y condiciones y un mecanismu d'apelación a decisiones de moderación de conteníu "que pueda entender hasta un neñu", esplicaron fontes comunitaries.

Esti vienres espira, amás, el plazu pa que les plataformes presenten el so primer exerciciu añal d'evaluación, "encamináu a amenorgar los riesgos asociaos al espardimientu de conteníos illegales o la manipulación de servicios con impactu nos procesos democráticos y la seguridá pública". Amás, tendrán de presentar los sos informes de tresparencia nun plazu de dos meses.

D'igual manera la llei introduz el conceptu de "responsabilidá algorítmica" pol que "la Comisión Europea, según los estaos miembros, van tener accesu a los algoritmos de les grandes plataformes online", obligaes d'equí p'arriba a desaniciar los productos, servicios o conteníos illegales rápido dempués de que se denunciaren".

Coles mesmes, la DSA introduz nuevos requisitos de tresparencia no que se refier a los parámetros de sistemes de reconmedación de conteníos qu'empleguen les plataformes dixitales y presenten a los sos usuarios el conteníu que consideren relevante pa los sos intereses. Por ello, grandes plataformes de conteníu según Google o otros destacaos motores de busca "van tener qu'ufiertar a los usuarios un sistema de recomendación que nun se base nel so perfil".

Nesti sentíu, reparáronse yá dellos cambeos importantes"sobremanera no que fai a l'actualización de los términos y condiciones d'usu de delles d'estos xigantes' y fontes comunitariess apuntaron que TikTok presentó un nuevu algoritmu que nun se basa nos perfiles de los usuarios y un archivu publicitariu "dafechu nuevu".

Nel casu d'otres plataformes como X (antes Twitter), que tán atravesando un gran procesu de tresformación, les mesmes fontes aseguraron que'l mesmu Elon Musk "lleó la DSA y gustó-y" anque, en xunu, cuando una delegación de Bruxeles visitó la sede de la plataforma, "nin de lloñe taben preparaos pa cumplir la normativa" anque s'amosaron "receptivos".

"Vamos tar bien sollertes al cumplimientu de la llexislación y vamos siguir bien de cerca los cambeos que s'anunciaron apocayá", incidieron estes fontes comunitaries.

Pel so llau, los Estaos miembru van tener que nomar coordinadores de servicios dixitales antes del 17 de febreru de 2024, fecha na que tamién les plataformes con menos de 45 millones d'usuarios activos --qu'entren nel ámbitu d'aplicación de la llexislación nacional-- van tener que cumplir toles normes de la DSA.

D'incumplise la norma, les plataformes y los motores de busca podríen recibir multes d'hasta'l 6% de la so facturación mundial ente que nel casu de 'los xigantes', la Comisión Europea va tener el poder esclusivu pa esixir dichu cumplimientu.

"Los mios servicios y yo vamos faer cumplir rigorosamente la DSA y vamos utilizar dafechu los nuesos nuevos poderes pa investigar y sancionar plataformes cuando tea xustificáu", afirmó'l comisariu européu de Mercáu Interior y Servicios, Thierry Breton, quien añadió que "cumplir la DSA nun ye un castigu, sinón una oportunidá pa que les plataformes refuercen la so fiabilidá".

Anque la llexislación nun va tener efectos "darréu visibles pa los usuarios", según reconocen dende Bruxeles, sí s'espera un impactu de llargu percorríu" que xenere cambeos "sustanciales" que contribuyan a desaniciar el conteníu illegal online.

La llei tamién pon llímite a los llamaos "patrones escuros de la web", sistemes d'interacción empleaos por delles compañíes n'Internet destinaos a la esplotación económica de los sos usuarios al traviés d'entrugues engañoses, ausencia de comparances de precios o de la introducción de torgues artificiales pa dar de baxa ciertos servicios.

Esta nueva llexislación tamién impón que cualquier plataforma de conteníos accesibles por menores "establezan midíes especiales de protección pa garantizar la so seguridá sobremanera cuando tengan conocencia de qu'un usuariu ye menor d'edá. Con eses va prohibise a les plataformes presentar publicidá empobinada basada nel usu de datos personales de menores tal como se define na lexislación de la UE".