La xornada de güelga de Mieres Tubos zarra con un 100% de siguimientu

MIERES, 15 d'Ochobre (EUROPA PRESS)

La xornada de güelga de la factoría Mieres Tubos, planta que forma parte del Grupu Condesa, consiguió esti miércoles un cien por cien de siguimientu. Tolos trabayadores participaron nuna multitudinaria protesta que se celebró en Vitoria, na sede del grupu, pa reclamar respuestes a los responsables de la firma. Lleven seis meses regulaos y creen que l'axuste va prollongase más nel tiempu.

Mientres la concentración, los miembros de la plantiya lleeron un manifiestu nel que recordaron que "la empresa almite que les plantes del Grupu Condesa son vidables". Cuenta con factoríes en Mieres (Mieres Tubos), Álava, Navarra y Valencia. Sicasí, tal como plantegaron los trabayadores nel comunicáu, "a pesar de la viabilidá, nesti momentu tamos falando d'una deuda de cerca de 300 millones xenerada por una pésima xestión".

"La dirección de la empresa, amás, desprecia a les clares a la plantiya. L'ocultismu ye la so forma de trabayu y dende'l 15 de xunetu alcontrámonos en situación de pre concursu. La información al respecto ye prácticamente nula", denunciaron. Aprovecharon la so protesta pa llanzar dellos mensaxes a la dirección: "Qu'esiximos un plan de viabilidá, el final de la so prepotencia y recordamos que los nuesos puestos de trabayu nun tán en venta".