El xulgáu de Grau va investigar la muerte por disparu d'un osu pardu en Belmonte ocurrida pel branu

   UVIÉU, 19 Dic. (EUROPA PRESS) -

   La Coordinadora Ecoloxista d'Asturies informó esti vienres de que la Fiscalía presentó una denuncia énte'l Xulgáu de Grau por un presuntu delitu contra la fauna y los animales, tres del afayu del cadabre d'un osu pardu en Cueves, nel conceyu de Balmonte.

   La Coordinadora denunciara énte Fiscalía l'afayu d'un exemplar d'unos 170 quilos qu'apaeció muertu'l branu pasáu con siquier un impactu de bala.

   La organización ecoloxista señaló qu'esti casu confirma una vegada más la caza illegal del osu pardu, una especie catalogada en peligru d'estinción. La Coordinadora recuerda que nos últimos meses denunciaron otros casos similares de furtivismu en diferentes conceyos asturianos, como Degaña o Ibias, ensin qu'hasta'l momentu s'esclariase.

   El colectivu llamentó que'l Gobiernu del Principáu d'Asturies negó l'accesu a los informes de necropsia de los osos muertos de forma violenta y que nun dexe que se-yos reconoza como parte interesada nos espedientes, acusando al Executivu d'ocultismu.

   A xuiciu de los ecoloxistes, la degradación de les condiciones de trabayu de los axentes de medio ambiente del Principáu ye una de les razones evidentes de la medría d'esti tipu de delitos de furtivismo