UVIÉU, 8 Oct. (EUROPA PRESS) -
L'escritor y músicu Xune Elipe afirmó esti xueves que recibir el Premiu Fuertes Acevedo d'Ensayu pola obra 'Hai una llinia trazada' supón "poner el ramu a una vida dedicada a la música asturiana".
Los miembros del xuráu destacaron d'esti trabayu que se trata d'una obra "que compendia la historia de la música asturiana nel so contestu históricu y llingüísticu" y que "va ser una obra de referencia".
"Faime muncha ilusión polo que supón d'apoyu a un milagru como ye esti de la nuestra música", indicó Elipe en declaraciones a Europa Press, pa destacar la importancia de qu'Asturies tenga'l dinamismu y la bayura sonora de la que gocia, dalgo qu'al so xuciu ye "escepcional" y esti premiu "vien a reconocelo y aprecialo".
Otra manera, diz que'l títulu de 'Hai una llinia trazada', que toma'l d'un conocíu cantar, quier simbolizar la continuidá del tiempu del fenómenu de la música asturiana. Asina, nel ensayu trátense los fechos más destacaos, amás de los movimientos y tendencies más importantes y los intérpretes y grupos que más incidencia tuvieron.
Con too, esplicó que nun ye namás una historia musical al usu, sinón que nella interrellaciónase l'aspectu musical cola realidá socio-política de cada momentu, amás de cola cuestión llingüística y con otros movimientos internacionales.
Una xera que llevó dellos años de documentación y un trabayu de redacción de tres años pa estructurar la obra. Nesi sentíu, Elipe destaca de la historia de la música asturiana "la voluntá férrea de ser y d'existir hasta nes peores circunstancies.
"N'Asturies la música, bien la de calter tradicional o bien la d'autor nes llingües propies del país, tuvo una importancia realmente bultable y definitiva na conformación y afitamientu de la nuestra identidá", señala Elipe, que ve'l futuru d'esti fechu musical con optimismu pola "volunta testerona de que la nuestra música siga viva y en constante evolución".
