UVIÉU, 8 Oct. (EUROPA PRESS) -
El cantante y líder del grupu Dixebra Xune Elipe ye'l ganador del Premiu d'Ensayu Fuertes Acevedo del Gobiernu d'Asturies cola obra 'Hai una llinia trazada. Historia de la música asturiana'.
Nesta obra, repásase'l fechu musical asturianu dende'l Paleolíticu hasta les últimísimes tendencies, interrellacionando too cola realidá socio-política de cada momentu, amás de cola cuestión llingüística y otros movimientos internacionales.
Los miembros del xuráu destacaron del trabayu de Xune Elipe que se trata d'una obra "que compendia la historia de la música asturiana nel so contestu históricu y llingüísticu", y afita'l merecimientu del gallardón nel "cuidáu y esmeru formal y intelectual presentáu con un rigor máximu, qu'en análisis nun desatiende l'axilidá descriptiva oportuna pa facer del llibru una llectura arriquecedora y prestosa a un mesmu tiempu". El xuráu fai constar nel acta que "va ser una obra de referencia".
Nesta edición, y baxo la presidencia del director xeneral de Política Llingüística, Antón García, el xuráu integráronlu las filólogas Marta López y María Cueto, la escritora Beatriz Quintana y los autores Jorge Arturo Sierra y José Ángel Gayol, vencedor de la edición pasada. Juncal García, del servicio de la Dirección Xeneral de Política Llingüística, actuó como secretaria. El premiu Máximo Fuertes Acevedo d'ensayu n'asturianu ta dotáu con 5.000 euros.
Xune Elipe, que yá tien publicaos dellos llibros, ye miembru fundador de la banda de rock Dixebra y creador del sellu discográficu Discos L'Aguañaz. Dedicáu dende mui mozu al mundu de la comunicación, fundó y dirixe l'Anuariu de la Música Asturiana, ye autor d'abondos artículos periodísticos y tien dirixío y presentao programes de radio y televisión.
