TOKIO, 25 de Marzu (Reuters/EP)
La mafia xaponesa, la 'yakuza', ta distribuyendo tonelaes d'ayuda ente los damnificaos pol terremotu y el posterior tsunami del pasáu 11 de marzu que yá dexó 27.000 muertos y desapaecíos.
La organización envió camiones dende les rexones de Tokio y de Kobe con alimentos, agua, cobertores y artículos de bañu pa los centros d'evacuación de les rexones del nordés de Xapón, la principal zona afectada pol desastre.
La 'yakuza' ye conocida poles sos actividaes mafioses rellacionaes cola estorsión, el xuegu, la pornografía y la prostitución, asina como polos tatuaxes que lleven los miembros que la integren. Anque esta crisis reveló la cara solidaria de la organización, movilizando los sos recursos pa dar ayuda a los refuxaos, pretenden facelo de forma discreta.
Igual que col terremotu de Kobe de 1995, les autoridaes fueron lentes a la hora de llevar ayuda a les zones afectaes pa los casi 300.000 supervivientes, polo que los grupos mafiosos movilizáronse, en dellos casos fueron los primeres en llegar al terrenu.
Estes acciones surden de la 'yakuza' porque saben lo que ye sentise apartáu y valise por sí mesmu, sin apoyu del Gobiernu o de la comunidá, dao que tán consideraos como marxinaos. Munchos miembros de la banda siéntense discriminaos y munchos vienen de minoríes, como coreanos y de 'burakumin', aquéllos que trabayen n'empreses rellacionaes cola muerte, como enterradores o curtidores de piel.
Según el prolíficu escritor Manabu Miyazaki, con más de 100 llibros sobre la 'yakuza' y les minoríes, esta mafia "son marxinaos de la sociedá". "Sufrieron y namás tán intentando ayudar a otros que tienen problemes", aseguró Miyazaki, fíu d'un ex xefe de la 'yakuza' en Kioto.
Otres persones creen qu'existen motivos ocultos pa esta solidaridá. "Si ayuden a la población, ye difícil que la Policía diga algo malo", comentó Tomohiko Suzuki, un periodista qu'escribió dellos llibros sobre los baxos fondos de Xapón.
"La 'yakuza' ta intentando posicionase pa llograr contratos pa les sos compañíes de construcción, ante la masiva reconstrucción que s'avera", añadió.
Ún de los xefes de la organización refuga estes crítiques. "Al Gobiernu lléva-y muncho tiempu llegar hasta equí polo que ye importante facelo agora", comentó un xefe citáu pola revista 'Weekly Taishuu', especializada nos asuntos d'esta mafia. "Los nuesos sentimientos agora mesmo son valir d'ayuda pal pueblu", añadió.
CÓDIGU "NINKIO"
La 'yakuza' yá envió 70 camiones a la zona del terremotu por valor de 350.000 euros, acordies con Jake Adelstein, espertu na mafia que vive en Tokio y qu'escribe un llibru sobre'l tema.
La solidaridá de la banda básase nel so códigu "ninkio", esplicó Adelstein, que valora la xusticia y les obligaciones, y prohíbe-yos que permitan el sufrimientu d'otros. "En momentos como colos terremotos, ponen el so dineru onde tán les necesidaes", añadió.
Atsushi Mizoguchi, escritor 'freelance' y enemistáu cola 'yakuza', qu'escribió sobre'l crime organizáu dende hai 40 años, tamién concede a la organización el beneficiu de la duda.
"Tres acceder a relaciones públiques, creo que realmente tienen bones intenciones", opinó Mizoguchi, que recibió dos ataques con arma blanca per parte de miembros de la banda, que refuga l'atención pol so trabayu humanitariu.
Adelstein esplicó qu'existe un acuerdu tácitu ente la 'yakuza' y la Policía que permite llevar a cabu dichu trabayu, pero que-y torga algamar publicidá al traviés d'él. Miyazaki aseguró que "lo que más busquen ye l'autosatisfacción". "Nun ye pol dineru, ye por arguyu", añadió.
Existen unos 80.000 'yakuzas' en Xapón. Créese que los sindicatos Sumiyoshi-kai y Inakawa-kai, les segundes y les terceres bandes más grandes, son los más activos na ayuda nel desastre.
Una de les razones de que los 'yakuza' se muestren roceanos a recibir atención vien del aumentu d'axentes de Policía tres l'aprobación d'una llei anti bandes en 1992 y de les redaes de l'Axencia Nacional de Policía nel últimu añu, qu'intensificó'l sentimientu anti-yakuza ente la población.
Anque en realidá nun existen informaciones de que se refugaren donativos, en parte porque nun existen nicios de que la mafia tea suministrando ayuda.
L'escritor Suzuki aseguró que nun ye'l momentu de parase en pequeñeces sobre l'orixe de los bienes. "Cuando se trata de vida o muerte, nun t'importa d'onde venga la comida", añadió.
