Begoña Sagasti, Loraldi eta Atxurkulu elkarteak eta '¡VIVA! Red Feminista de Arte' proiektua, Zirgari 2026 saridunak

BILBO 24 (EUROPA PRESS)

Begoña Sagasti feminista historiko bizkaitarrak (ohorezkoa), Loraldi Elkarteak eta Atxurkulu Emakumeen Elkarteak (erakundea) eta 'VIVA! Red Feminisa de Arte y Pensamiento Contemporáneo' egitasmoak (proiektua) jasoko dituzte Bizkaian emakumeen eta gizonen berdintasunaren aldeko ibilbideak eta ekimenak aitortzen dituzten 2026ko Zirgari sariak.

Teresa Laespada Bizkaiko ahaldun nagusiorde eta Enplegua, Gizarte Kohesioa eta Berdintasuna Sustatzeko foru diputatuak eta Nora Sarasola BBKren Gizarte Ekintzako zuzendariak astearte honetan eman dute sarien epaimahaiaren erabakiaren berri, prentsaurrekoan. Bizkaiko Foru Aldundiak eta BBK Fundazioak sustatutako sarien banaketa ekitaldia martxoaren 5ean egingo da, Bilboko BBK Salan.

Teresa Laespadak, ahaldun nagusiordeak eta Enplegua, Gizarte Kohesioa eta Berdintasuna Sustatzeko foru diputatuak, eta Nora Sarasolak, BBK Gizarte Ekintzako zuzendariak, gaur goizean eman dute epaimahaiaren erabakiaren berri, prentsaurrekoan.

Bere hitzaldian, Laespadak defendatu du gaur egungo egoera sozial eta politikoan indartu egin behar dela "feminismotik eta berdintasunetik emandako erantzuna, konpromisotik, alaitasunetik eta itxaropenetik abiatuta". "Zailtasunetatik eta bizitzen ari garen momentutik harago, batasunetik erantzuteko unea da, adimen demokratikoz eta feministaz. Beste askotan bezala, onena ematen ari gara berdintasunaren aldeko borrokan, hau da, giza duintasunaren aldeko borrokan", azpimarratu du.

Era berean, Sarasolak azpimarratu duenez, "BBKn ziur gaude berdintasuna dela pertsona guztientzako etorkizun hobe bat eraikitzeko oinarria. Horregatik, hezkuntzaren, sentsibilizazioaren eta erakundeekin, enpresekin eta gizarte eragileekin aliantzak egiteko sare sendo baten aldeko apustua egiten dugu".

Bere hitzetan, "berdintasunaren alderdi askotan aurrerapenak lortu badira ere, oraindik ere desberdintasun nabarmenak daude hainbat eremutan, hala nola lanean, kirolean, genero indarkerian edo baliabide ekonomiko eta sozialetarako sarbidean".

SARITUAK

Begoña Sagasti Barriok Berdintasunaren aldeko Zirgari ohorezko saria jasoko du. 1970eko hamarkadatik etengabeko presentzia izan du Euskadiko mugimendu feministan. Bere militantzia Bizkaiko Emakumeen Asanbladan hasi zen eta, harrezkero, funtsezko zeregina izan du, askotan ikusezina: feminismoaren memoria kolektiboa dokumentatzea eta gordetzea.

Kazetaritzan eta komunikazioan izandako esperientzia profesionala erabakigarria izan zen Maite Albiz Emakumeen Dokumentazio Zentroa sortzeko apustuan, eta zentro horren sortzaileetako bat da. Lau hamarkada baino gehiagotan sareak ehundu ditu, laguntza instituzionalak artikulatu ditu eta ezinbestekoa izan den talde lanari eutsi dio.

Erakunde sarituei dagokienez, Loraldi Elkartea 1990ean sortu zen, Urduñan, eta bertan topaketa eta ahalduntze sarea ehuntzen joan da. 80 emakume dira, kultura berdintasunerako tresna bihurtu dutenak tailerren, irakurketaren, artearen eta elkarri laguntzeko espazioen bidez, bakardadeari aurre eginez eta komunitatea indartuz.

Bere lanak emakume aitzindarien memoria berreskuratu du, haien istorioak espazio publikora itzuliz. Gainera, urtero, berdintasuna hausnarketa partekatu bihurtzen dute martxoaren 8an, eta euren konpromiso solidarioak ekintza feminista ongizatearekin eta justizia sozialarekin lotzen du.

Busturiko Atxurkulu Emakumeen Elkartea, berriz, 1990eko hamarkadaren amaieran sortu zen, eta argi frogatu du, udalerri txiki batean ere, emakumeen elkartegintza erreferentzia komunitario bihur daitekeela. 32 emakume parte hartzetik buru izatera igaro dira, kultur jarduerak, herriko jaiak, boluntariotza gaiak eta topaguneak antolatuz.

Azkenik, proiektuaren kategorian, '¡VIVA! Red feminista de arte y pensamiento contemporáneo' deritzonak jasoko du Zirgari saria. Xabier Arakistainek eta Lourdes Mendezek bultzatutako elkartea 2018an eratu zen Bilbon, artearen barruan dauden desberdintasunak pentsamendu feministatik aztertu eta zalantzan jartzeko.