Bilboko Udalak bukatu ditu Deustuko Done Petri plaza urbanizatzeko obrak, 4,15 milioi euroko inbertsioa eginda

BILBO, 7 (EUROPA PRESS)

Bilboko Udalak bukatu ditu Deustuko Done Petri plaza urbanizatzeko lanak, besteak beste, plaza berritzea eta irisgarritasuna eta egoteko eta gozatzeko elementuak hobetzea, eta bidegorria egitea Agirre Lehendakaria etorbidearen bi noranzkoetan. Obrak 2021eko martxoan hasi ziren eta 4.150.477,14 euroko aurrekontua izan dute.

Juan Mari Aburto alkateak, Asier Abaunza Obretako, Hiri Plangintzako eta Proiektu Estrategikoetako Saileko zinegotziak eta udalbatzako zenbait ordezkarik ingurua bisitatu dute astearte honetan.

Guztira, 18.000 metro koadro baino gehiagoko espazioan esku hartu da, hiru eremu handitan banatuta: bidearen iparraldean dagoen plazaren zatia (plazaren bi heren, gutxi gorabehera), hegoaldean dagoena eta mendebaldean dagoena, Agirre Lehendakaria etorbideko 2 eta 6 zenbakien arteko espaloia hartzen duena, alegia.

Lanen barruan sartu dira, besteak beste, plaza berritzea, irisgarritasuna eta gozatzeko elementuak hobetzea, eta Agirre Lehendakaria etorbideko bidegorri bat egitea bi noranzkoetan. Gainera, espaloiak kalearen tarte batean handitu dira, eta noranzko bakoitzean errei bat murriztu da. Orotara, plazan lau zuhaitz gehiago daude orain, eta berdeguneek ere 303 metro koadro gehiago dituzte, eremu guztian.

Proiektuarekin, udalaren lehentasuna izan da plazari izaera bakarra ematea etorbidearen alde bietan. Horretarako, murriztu egin du, ahalik eta gehiena, erditik doan bidearen eragina.

Gainera, obren beste helburu batzuk izan dira oztopo arkitektonikoak kentzea eta espazio publikoari egungo garaiekin bat datorren irudia ematea. Aldi berean, ingurua erabiltzen duten pertsonen beharrei erantzun nahi izan da. Horregatik, lehengo kokalekuetako erabilerak atxiki dira, hala nola egoteko guneak, jolasguneak, azokak antolatzeko espazioa eta agertokia.

Izan ere, jarduera eremuak hainbat gune ditu, eta guneotan garatzen den jardueraren araberako tratamendu espezifikoa behar dute. Hala ere, diseinua eta akaberako materialak bateratu egin dira, espazioari koherentzia eta batasuna emateko. Era berean, hornidura, saneamendu eta argiztatze sareak berritu dira obrak hartzen zuen eremuan.