Bilboko Udaltzaingoak 13 pertsona atxilotu ditu faltsututako arropen salmentaren aurkako operazio batean

BILBO 27 (EUROPA PRESS)

Bilboko Udaltzaingoak hiriko zenbait tokitan marka ezagunetako jantzi faltsutuak banatzen eta saltzen ziharduen erakunde bat desegin du, eta operazioan 13 pertsona atxilotu ditu industria jabetzaren aurkako delituak egitea eta talde kriminaleko kide izatea leporatuta.

Bilboko Udaletik jakinarazi dutenez, ikerketa 2025eko azaroan hasi zen, Gabonetako kanpainan bisitari gehiago zegoela baliatuta. Agenteek ikusi zuten inplikatuek egoera hori aprobetxatzen zutela jendearen joan-etorri handiko merkataritza eremuetan kirol ekipamendu faltsutuen salmenta areagotzeko, bereziki Zazpikaleetan, Kale Nagusian eta Berastegi kalean.

Zaintza lanari esker, udaltzainek egiaztatu zuten egitura antolatu eta hierarkizatua zutela, eta haien artean funtzioak argi eta garbi bereizita zituztela. Taldearen barruan honako hauek zeuden: banatzaileak, salgaia hornitzeaz eta birjartzeaz arduratzen zirenak; saltzaileak, jantziak bide publikoan jartzen zituztenak; poliziaren presentziaz ohartarazteko eginkizuna zuten pertsonak, eta kolaboratzaileak, noizean behin taldekoei elikagaiak eta edariak ematen zizkietenak.

Banatzaileak arduradun baten agindupean aritzen ziren -erakundearen burua-, eta hirian aktibo zeuden ia saltzaile guztiak hornitzen zituzten. Horiek errutina finkoak zituzten, hala ordutegietan nola salmentarako aukeratutako kokapenetan.

Poliziaren jarduketak hainbat astez luzatu ziren, inplikatu asko zeudelako. Azkenean, 12 pertsona atxilotu zituzten hasieran, eta, ondoren beste bat, sarearekin lotura zuelakoan. Operazioan 3.500 bat jantzi faltsutu ere konfiskatu zituzten, eta 3.000 euro baino gehiago atzeman zituzten eskudirutan, bai eta gama altuko zenbait sakelako telefono ere, jarduera koordinatzeko erabiliak.

Kaltetutako marken legezko ordezkariek laguntza eman zuten operazioan, konfiskatutako arropak faltsuak zirela egiaztatzeko peritu-txostenak aurkeztuz. Arropa marka horiek egindako kalkuluen arabera, konfiskatutako salgaiek 400.000 euro inguruko kalte ekonomikoa eragingo zuketen.

Erakundearen ustezko arduraduna epailearen esku utzi zuten joan den otsailaren 18an, eta, epailearen aurrean deklaratu ondoren, harek behin-behinean aske uztea erabaki zuen, prozeduraren instrukzioak aurrera jarraitzen duen bitartean. Ikerketa irekita dago, eta baliteke beste atxiloketa batzuk egitea operazioaren esparruan.