Bizkaiko Aldundiak bi milioi euro erabiliko ditu nekazaritza eta abeltzaintzan lehortearen ondorioak arintzen laguntzeko

BILBO 7 (EUROPA PRESS)

Bizkaiko Foru Aldundiak bi milioi euro bideratuko ditu prezipitaziorik ezak eta tenperatura altuek aurten Bizkaiko lehen sektorean izandako eraginekin zerikusia duten hainbat neurritara. Plana azken hilabeteetan zehaztu da nekazaritza sindikatu eta elkarteekin izandako bileretan, zeinetan sektoreak ustiategien egoeraren eta beharrizanen berri eman duen. Neurriak EHNE Bizkaia eta ENBA sindikatuekin, Lursail eta sektoreko zenbait elkarterekin adostu dira, foru erakundetik jakinarazi dutenez.

Aurreikusitako bi milioi euroetatik, 1,5 milioi Bizkaiko nekazaritzako eta abeltzaintzako 1.000 bat ustiategirentzako zuzeneko laguntzetara bideratuko dira. Gainerako 500.000 euroak, 2026ko eta 2027ko aurrekontuetan banaturik, onura publikoko mendietan eta ondare mendietan inbertitzeko erabiliko dira. Planak, gainera, laguntzak jasotzen ditu lehorteak hondatutako larreak berreskuratzeko. Jarduketa horiek, 2027ko inbertsioen dekretuan sartuko badira ere, 2026an gauzatu ahal izango dira.

Zuzeneko laguntzak bi ildoren bidez banatuko dira: bata abeltzaintza ustiategientzako eta bestea nekazaritza ustiategientzako. Ustiategi bakoitzak 7.500 euroraino jaso ahal izango ditu laguntza ildo bakoitzeko, nagusiki nekazari gisa diharduen pertsona (NNP) bat badu. Gehieneko zenbatekoa 10.000 euro izango da nekazari gisa diharduen pertsona bat baino gehiago duten ustiategientzat. Kasuan kasuko zenbatekoa zehazteko, ildo bakoitzerako ezarritako irizpideak hartuko dira kontuan.

Bizkaiko Lurralde Historikoko Abeltzaintzako Ustiategien Erregistro Orokorrean edo Nekazaritza Ekoizpenaren Erregistro Orokorrean inskribatuta dauden ustiategiek jaso ahal izango dituzte laguntzak, baldin eta NNPak badira edo 3.500 euroko gutxieneko diru-sarrerak aitortzen badituzte.

Laguntzak ezartzeko, tenperatura altuen eta prezipitaziorik ezaren ondorioei buruz Lursailek egindako txostena hartu da erreferentziatzat. Analisi horren arabera, afekzioa antzekoa izan da Bizkai osoan, baina eragin handiagoa izan du abeltzaintza estentsiboan.

IZAPIDETZEA OFIZIOZ

Bizkaiko Foru Aldundiak ofizioz izapidetuko ditu laguntzak; hortaz, sartutako ustiategiek ez dute hasiera batean eskabiderik aurkeztu beharko laguntzak eskuratzeko. Foru erakundeak foru agindu proposamen bat egin eta onuradunei helaraziko die, eta, une horretatik aurrera, hamar eguneko epea izango dute egokitzat jotzen dituzten alegazioak aurkezteko.

Dagozkion izapideak egin ostean ordainduko dira laguntzak. Aurreikuspenen arabera, ustiategiak datorren azaroan hasiko dira laguntzak jasotzen.

Zuzeneko laguntzez gain, planak barne hartzen ditu ukitutako larreak berreskuratzearekin eta mendien azpiegiturekin lotutako jarduketak. Larreen berrereintza 2027ko inbertsio dekretuan aurreikusitako jarduketetako bat izango da, baina lanak 2026an egin ahal izango dira, lehorteak hondatutako belardiak berreskuratzeko.

Azkenik, 500.000 euro bideratuko dira, 2026ko eta 2027ko aurrekontuen kontura, onura publikoko mendietan eta ondare mendietan egin beharreko inbertsioetara, klima aldaketaren ondorioei erantzuteko azpiegiturak hobetze aldera.