Bizkaiko Aldundiak bost milioi euro inbertituko ditu lurraldean landa izaera handiena duten udalerrietan

BILBO 6 (EUROPA PRESS)

Bizkaiko Foru Aldundiak ezohiko laguntzen programa berri bat jarriko du martxan lurraldean landa izaera handiena duten udalerrientzat eta bost milioi euroko inbertsioa egingo du. Ekimenaren helburua da landa bideak hobetu eta mantentzea, lurralde kohesioa indartzeko eta aukera berdintasuna bermatzeko, bizilekua edozein dela ere.

Foru erakundeak jakinarazi duenez, programak zuzenean erantzuten die Elixabete Etxanobe ahaldun nagusiarekin egin ziren eskualde topaketetan udalerriek azaldutako eskaerei; topaketa horietan agerian geratu zen berariazko sostengua behar dela landa azpiegiturak mantentzeak dakarren kostu handiari aurre egiteko, batez ere udalerri txikienetan eta biztanleria dentsitate apalena dutenetan.

'Bizkaia Denontzat' estrategiaren barruan dago jarduketa; estrategia horren helburua da lurraldea era orekatuan garatzea eta landa eremuei arreta berezia ematea. Horretarako, laguntza horiek arautzeko dekretuak kontuan hartuko du Landa Ingurunearen Garapenaren Legean jasotako landatar mapa eta biztanleria dentsitatea, eta aitortuko du biztanle gutxieneko udalek egin beharreko ahalegin ekonomiko handiagoa.

Guztira, Bizkaiko 83 landa udalerriri ekarriko die onura programak, eta gehienez 60.000 euroko laguntza jaso ahal izango du bakoitzak. Diru laguntzak irizpide objektiboen arabera banatuko dira, landatar maila eta biztanleria dentsitatea kontuan hartuta.

Ingurune Naturala eta Nekazaritza Sustatzeko Sailak kudeatuko du programa, Nekazaritza Zuzendaritzaren bidez, eta esklusiboki zuzentzen zaie indarrean dagoen araudiaren arabera landatar jotzen diren udalerriei.

Horrela, laguntzen onuradun izan ahalko dira, besteak beste, Arakaldo, Karrantza, Lanestosa eta Ziortza-Bolibar, arreta bereziko eremuetan sartuta baitaude, bai eta landatartasun handiko beste batzuk ere, hala nola Aulesti, Morga, Ereño, Arratzu eta Gautegiz Arteaga, eta biztanleria-dentsitate apaleko udalerriak, Orozko eta Balmaseda kasu.

Aurreikusi da dekretu arautzailea aurtengo udaberrirako argitaratuko dela, eta 2027ko apirilera arteko epea ezarriko da laguntzak justifikatzeko.