Bizkaio Aldundiak 46.000 euro banatuko ditu ondare etnografikoa kontserbatu, ikertu eta ezagutarazteko laguntzetan

BILBO 12 Jun. (EUROPA PRESS) -

Bizkaiko Foru Aldundiak 46.000 euroko inbertsioa onetsi du ostegun honetako gobernu bileran, 2025ean lurraldeko ondare etnografikoaren arloan jarduerak finantzatzeko, Leixuri Arrizabalaga foru erakundeko bozeramaileak iragarri duenez.

Ekimena bat dator Bizkaiko Aldundiko Euskara, Kultura eta Kirol Sailaren helburuekin, hau da, lurraldeko ondare historiko-kulturala ikertu, kontserbatu, ezagutarazi eta kudeatzea, eta bere balio nagusiak gizarteratu eta transmititzera bideratutako programak garatzea.

Diruz lagundu daitezkeen jardueren helburua izan beharko da Bizkaiko kultur ondare etnografikoa zaintzen eta jendarteratzen laguntzea. Ekintza horien bidez, herritarrak aberastu eta sentsibilizatu beharko dira ondarearen garrantziaz, hala nola leku eta eraikuntza historiko, lurraldeko kultur tradizioen ordezkari diren ondasun higigarri, oinordetutaklo ezagutza eta ondare immaterialaren garrantziaz.

Finantzaketa jaso ahal izango duten jarduera arloen artean daude ondare etnografikoari buruzko biltzar, jardunaldi, mintegi edo ikastaroak antolatzea, eta ondare etnografikoa ikertu, dokumentatu, interpretatu, aztertu, katalogatu, erregistratu, kontserbatu, berreskuratu, nabarmendu, jendarteratu, argitaratu eta ezagutaraztea.

Eskabideak aurkezteko epea ekainaren 18an hasiko da eta 20 egun naturalekoa izango da. Pertsona fisikoek Bizkaiko Foru Aldundiko Kultura Ondarearen Zerbitzuaren bulegoetan aurkeztu ahal izango dituzte diru laguntzen eskabideak.

Administrazio Publikoen Administrazio Prozedura Erkidearen urriaren 1eko 39/2015 Legearen 16.4 artikuluan zehaztutako moduan eta Bizkaiko Foru Aldundiaren egoitza elektronikoan ere aurkeztu ahalko dira eskaerak; irabazi asmorik gabeko erakunde pribatuen kasuan, egoitza elektroniko horren bidez aurkeztu beharko dira nahitaez.

"Deialdiak azpimarra jartzen du Bizkaiko Foru Aldundiak ondare etnografikoa kontserbatu eta nabarmentzeko duen konpromisoan, Bizkaiko nortasun kulturala osatzen duten tradizio eta bizimoduen ikerketa eta zabalkundea sustatuz", azaldu du Arrizabalagak.