Donostia Zinemaldiak Lillian Hellman gidoigileari eskainiko dio 73. edizioko atzerabegirakoa

DONOSTIA, 8 (EUROPA PRESS)

Lillian Hellman gidoigilea izango da Donostia Zinemaldiaren 73. edizioko atzerabegirakoaren protagonista. Hollywood klasikoko izen handietako bat da Hellman, eta William Wyler, Arthur Penn, William Dieterle edo George Roy Hill moduko zuzendariekin lan egin zuen.

Donostia Zinemaldiak eta Euskadiko Filmategiak antolatu dute zikloa, Espainiako Filmotekarekin elkarlanean, eta liburu bat ere argitaratuko dute, hiru emakumezko idazlek ondua, Hellmanen ibilbidearen alderdi guztiak aintzat hartuta.

Donostia Zinemalditik jakinarazi dutenez, Lillian Hellman (1905-1984) urte luzez izan da "enigma erabatekoa". Antzerkigile, eleberrigile eta gidoigile estatubatuarrak garai gatazkatsuak bizi izan zituen, hasi Depresio Handitik eta macarthismoaren sorgin ehizara arte, eta horien islak ageri dira bere obran, misteriotsua izanagatik, askok aldarrikatu dutena, batik bat alderdi zinematografikoa.

Donostia Zinemaldiak bere lana gogoratu nahi du atzerabegirakoaren bidez, eta Hellmanen obra zinematografiko guztia eskaini, "funtsezkoa baita Hollywoodek joan den mendeko 30eko hamarkadatik 60kora izandako bilakaera estilistiko, tematiko eta ideologikoak ulertzeko".

William Wylerren 'The Little Foxes' (1941) eta 'The Children's Hour' (1961) eta Arthur Pennen 'The Chase' (1966) bezalako filmetan esku hartu zuen, besteren testuekin gidoia eginez edo bere antzezlanen egokitzapena eginez.

William Wylerrekin harreman oparoa izan zuen, aipatu bi filmez gain, Wylerrek 'These Three' (1936) ere zuzendu baitzuen, hots, 'The Children's Hour' antzezlanaren lehen bertsioa, eta drama soziala eta zinema beltza uztartzen dituen 'Dead End' (1937) filmean ere elkarrekin lan egin zuten.

Gidoia egokitu zuelako edo bere testuren baten egokitzapena egin zutelako, besteak beste, Lewis Milestone -'The North Star' (1943)-, William Dieterle -'The Searching Wind' (1946)-, Michael Gordon -'Another Part of the Forest' (1948)- eta George Roy Hill -'Toys in the Attic' (1963)- zuzendarien filmetan parte hartu zuen.

Ideologiari dagokionez, berebiziko garrantzia izan zuen Dashiel Hammett genero beltzeko egile handiarekin izan zuen harremanak. Ezkerrarekin eta AEBetako Alderdi Komunistarekin konprometituta zegoen Hammet, eta oso presente dago Hellmanen 'Pentimento' memoria-liburuan.

Fred Zinnemannek 'Julia' (1977) filma ondu zuen horretan oinarrituta, eta Jane Fondak gorpuztu zuen Hellman, Jason Robardsek egin zuen Hammetten pertsonaia eta Vanessa Redgrave izan zen Julia, idazlearen haurtzaroko laguna, nazismoaren goraldi betean Vienan topatuko duena.

Hellmanen hirugarren liburu autobiografikoa, 'Scoundrel Time' (1976), sorgin ehizaren eta jokabide antiamerikarren batzordearen garaian ardazten da. Kathy Bates aktoreak 'Dash and Lilly' telefilma zuzendu zuen 1999. urtean, Hammetten eta Hellmanen arteko harremana oinarri hartuta.