Donostiako Indarkeria Matxistak Nerabezaroan X. Jardunaldia urriaren 22an egingo da

DONOSTIA 18 (EUROPA PRESS)

Donostiako Udaleko Donostia Gazteria erakundeak eta Berdintasun Sailak urriaren 22an egingo dute Indarkeria Matxistak Nerabezaroan jardunaldiaren hamargarren edizioan. Sarrera doakoa den arren, izen-ematea beharrezkoa da edukierak mugatuak direlako, eta epea ostiral honetatik urriaren 4ra arte dago zabalik. Parte hartzaileak inskripzioaren hurrenkeraren arabera hautatuko dira.

Donostiako Udaletik jakinarazi dutenez, jardunaldiaren hamar urteko ibilbidean, nerabezaroko indarkeria matxistak ulertzeko eta lantzeko funtsezkoak diren hainbat alderdiri buruz hausnartu dute, besteak beste, tratu onak, 'bullying' delakoaren azterketa genero ikuspegitik, sexu heziketa hezkidetzailea, intersekzionalitatea eta ziberindarkeria.

Aurten, "esparru komunitarioaren potentzial positiboa argiago marrazten den une honetan, ikuspegi hori bizitzeko, problematizatzeko eta sakontzeko aukera emango duten hainbat formatu" planteatuko dira. "Parte sentitzen garen leku hori dira komunitateak, babestuta sentiarazten gaituztenak, elkarrekikotasun loturak dauden lekua", azaldu dute.

Antolatzaileen arabera, "indibidualismoa saihestezina eta gero eta indartsuagoa dela sinestarazi nahi diguten arren, pertsonok komunitatean gauzatu eta sostengatzen gara. Aldi berean, komunitateak zerbait performatiboa dira: egitean, sentitzean eta pentsatzean gauzatzen dira. Hori guztia are garrantzitsuagoa da nerabezaroan".

Horela, jardunaldian balioa eman nahi zaie feminismotik indarkeria horiei heltzeko mekanismoak sortzen eta esperimentatzen dituzten komunitateei. Hori guztia lantzeko, Sorginlore Gizarte Elkartearekin aritu da elkarlanean Donostiako Udala.

Haurrekin, nerabeekin eta gazteekin lanean edo kontaktuan dauden eragileei zuzenduta dago jardunaldia, batik bat. Izen-ematea beharrezkoa da eta Donostia Gazteriaren webgunean egin daiteke.