EAEko txikizkako merkataritzaren salmentak %1,7 gehitu dira urteko hirugarren hiruhilekoan

BILBO 6 (EUROPA PRESS)

Euskal Autonomia Erkidegoko (EAE) txikizkako merkataritzaren salmentak %1,7 gehitu dira 2026ko hirugarren hiruhilekoan, iazko hiruhileko beraren aldean, prezio konstanteetan eta egutegiaren eraginak zuzendu ondoren. Aurreko hiruhilekoarekin alderatuta, berriz, prezio konstanteetako salmentak %0,3 hazi dira, dagozkien urtaro eraginak kenduta, Eustat euskal estatistika erakundearen datuen arabera.

Salmenten urtez urteko bilakaera positiboa izan da elikadura produktuetan, gainerako produktuetan eta automoziorako erregaian, %2,1eko, %0,8ko eta %3,4ko igoerekin, hurrenez hurren, 2025eko hirugarren hiruhilekoarekin alderatuta. Hiruhileko arteko datuei dagokienez, elikadura produktuetan salmentak %0,7 gehitu diren bitartean, gainerako produktuetan %0,2 eta eta automoziorako erregaian %0,7 jaitsi dira.

Elikaduraren sektorean, 2025eko hirugarren hiruhilekoaren aldean, salmentak %5,1 jaitsi dira elikaduran, edarietan eta tabakoan espezializatutako merkataritzan (fruta-dendak, harategiak, arrandegiak eta abar). Elikagaiak, edariak eta tabakoa nagusi diren merkataritza ez-espezializatuan (batez ere supermerkatuak eta hipermerkatuak), ostera, salmentak %4,5 hazi dira.

Gainerako produktuen salmentei dagokienez, pertsonen ekipamenduan espezializatutako sektorean salmentak %2,8 hobetu dira (arropa, oinetakoak, produktu kosmetikoak edo higienekoak), eta etxeko ekipamenduan espezializatutako sektorean %2,5 (etxetresna elektrikoak, altzariak eta telekomunikazio ekipoak barne).

Aitzitik, kontsumoko beste ondasunetan espezializatutako sektorean (besteak beste, kirol gaiak, jokoak edo jostailuak), salmentek %3,6 egin dute behera, eta gainerako produktuak nagusi diren establezimendu ez-espezializatuetan %3,0 (korrespondentzia edo Internet).

Bestalde, lurralde historikoei dagokienez, 2026ko hirugarren hiruhilekoko txikizkako merkataritzaren salmenta indizeak urte arteko aldakuntza tasa positiboa izan du hiruretan: Araban %3,6, Gipuzkoan %1,9 eta Bizkaian %0,9. Aurreko hiruhilekoaren aldean, Araban %1,2 hazi dira salmentak, eta Gipuzkoan %0,4; Bizkaian, berriz, %0,1 jaitsi dira.

Azkenik, txikizkako merkataritzaren sektorean landunen kopuruak %0,5 egin du gora 2026ko hirugarren hiruhilekoan EAE osoan, joan den urteko hirugarren hiruhilekoaren aldean, eta 2026ko bigarren hiruhilekoaren aldean, enplegua %0,6 igo da.