EITBPodkast atariak Euskaraldiarekin bat egin eta 'Zapla!' podcast berria estreinatuko du asteartean

BILBO, 31 (EUROPA PRESS)

EITBPodkast atariak bat egingo du Euskaraldiaren hirugarren edizioarekin, eta 'Zapla!' podcast berria estreinatuko du asteartean, azaroaren 1ean. Monika Belastegi eta Juankruz Lakasta kazetariek gidatuta, belarriprest eta ahobizi guztientzat lagungarri izango diren ariketak proposatuko ditu astero.

EITBk jakinarazi duenez, podcast berriak lau atal izango ditu eta bakoitzean gai nagusi bat landuko da. Hasteko, estres linguistikoa eta hizkuntza asertibitatea jorratuko dira, ikuspegi psikologikoa aztertuz; bigarren atalean hizkuntza hautua eta hizkuntza ohiturak aldatzeko prozesua aztertuko da; hirugarrenean, hizkuntza portaerak landuko dira, asertiboki jokatzeko baliabide zehatzak eskainiz; amaitzeko, laugarren atalean, hiztunen praktikarako gune babestuen sorrera aztertuko da.

Era berean, atal bakoitzean hizkuntza hautua ardatz duen testigantza bana egongo da. Horretarako eremu ezberdinetan ari diren gonbidatuak izango dituzte, besteak beste, kazetariak, kultur sortzaileak eta unibertsitateko irakasleak.

Hizkuntza portaerei lotutako kontzeptuak lantzea da helburua eta, batez ere, baliabide praktikoak ematea. Horretarako, egoera errealak irudikatu eta tresna zehatzak eskainiko dira.

Podcasta Euskaraldiaren testuinguruan sortu den arren, epe luzean erabilgarri izateko helburua du. Bertan sortutako materiala baliagarria izan daiteke TELP tailerretan, euskaldunon ahalduntze eskoletan, euskaltegietan eta eskoletan, baina baita hizkuntzaren gainean gogoeta egin nahi duen edozein herritarrentzat eta euskaltzaleentzat ere.

Euskaraldiaren helburua da euskararen erabilera handitzeko herritarren hizkuntza ohituretan eragitea eta herritar zein era guztietako entitateen hizkuntza praktiketan euskarak presentzia handiagoa izatea. "Helburu hauek lortzeko oso garrantzitsua da herritarrei hizkuntza ohiturak aldatu eta praktika linguistikoak indartzeko baliabideak eskaintzea. Izan ere, hizkuntza ohiturak aldatu nahi dituen edozein lagunek tresnak behar ditu, psikologiaren eremuko tresnak", adierazi dute EITBtik.