EUSKADI.-Kutxak ISO 27001 ziurtagiria lortu du Kutxanet bere banka elektronikoaren kanalerako

DONOSTIA 26 Ene. (EUROPA PRESS) -

Kutxak ISO 27001 ziurtagiria lortu du Kutxanet bere banka elektronikoaren zerbitzurako. Aenor erakundeak emandako ziurtagiri honen bidez -Euskal Herriko finantza-erakunde batek lortutako lehena da-, Gipuzkoako Kutxak ziurtatzen du informazioaren babes elektronikoa kudeatzeko dituen sistemak, informazio horren konfidentzialtasuna, integritatea eta erabilgarritasuna bermatzekoak, segurtasun arloko praktika egokien nazioarteko arauetan oinarritzen direla, eta praktika horiek denboran zehar mantentzen ari direla.

ISO 27001 ziurtagiriari esker, "Kutxak berretsi egin du informazioaren segurtasunarekin duen konpromisoa, horixe delako bere kudeaketaren oinarrizko elementuetako bat". "Gainera, bezeroei konfiantzarako beste elementu bat eskaintzen die kanal elektroniko honetan", azaldu dute kutxa gipuzkoarreko arduradunek.

Informazioaren Segurtasuna Kudeatzeko Sistema bat inplementatzeak, honetan oinarritu baita Kutxak orain lortutako ziurtagiria, "abantaila-sorta garrantzitsua" darama berekin, bai erakundearentzat eta baita erakundearen bezeroentzat. Ildo horretatik, "segurtasuna kudeatzeko esparru sendo eta nazioartean aintzatetsia ezartzen du, praktika egoki hainbat definitzen ditu informazioaren segurtasuna kudeatzeko, segurtasun arriskuak murrizten ditu eta oreka ezartzen du segurtasun fisiko, tekniko, prozedurazko eta pertsonalaren artean".

Gainera, Kutxak segurtasunarekin duen konpromiso honen abala den "sistemak informazioaren konfidentzialtasuna, integritatea eta erabilgarritasuna bermatzea ahalbidetu eta hirugarrenekiko harremanekiko erabateko konfiantza sortzen du".