DONOSTIA, 30 (EUROPA PRESS)
Euskadiko Lanbide Heziketako Belaunaldien Arteko I. Jardunaldia egingo da ostiralean, martxoaren 31n, Donostia Kursaal jauregian, eta Lanbide Heziketako 600 ikasle baino gehiago eta martxoan zehar proiektuak garatzen lagundu dieten adinekoak bilduko ditu. Gainera, proiektuak ere ekitaldian bertan aurkeztuko dira.
Eusko Jaurlaritzatik jakinarazi dutenez, ekitaldia 09:00etan hasiko da, eta Jorge Arevalo Lanbide Heziketako sailburuordeak inauguratuko du. Topakerta ordu erdi geroago hasiko da, eta 11 ikastetxe parte hartzaileetako ikasleek, dokumentazio grafikoz eta martxoan egindako tailerretan parte hartu duten adineko batzuek lagunduta, beren proiektua azalduko diete Lanbide Heziketako gainerako ikastetxeei.
Ekimenean parte hartu duten eta ostiralean Kursaaleko jardunaldira joango diren adinekoen artean 92 eta 93 urteko bi emakume egongo dira, Balentziagaren taldean lan egin zuten bi jostun, hain zuzen ere, antolatzaileek nabarmendu dutenez.
Angel Alkainek egingo ditu aurkezle lanak eta parte hartu duten Lanbide Heziketako ikastetxeek beren proiektuak aurkeztuko dituzte. Epaimahaiak proiektu eta tailerren balorazioa egin ondoren, 13:15 aldera emango du ezagutzera epaia. Ekitaldiaren bukaeran, sari banaketa egingo da. Era horretan, egindako proiektua eta teknologia mailan zein giza mailan horrek duen konpromisoa baloratuko dituzte.
'Iragana, oraina eta etorkizuna Lanbide Heziketan: tradizioa eta berrikuntza' lelopean, martxoaren 6tik 10erako bitartean belaunaldien arteko tailerrak egin ziren Lanbide Heziketako 11 ikastetxetan, Euskadiko Lanbide Heziketako ikasleei ezagutzak transmititu eta
esperientzia, teknologia eta kulturaren aberastasuna berreskuratzeko, eta adin talde desberdinetako pertsonen arteko harremanak sustatzeko.
"Belaunaldi tailerren lehen edizio honek berretsi egin du gure adinekoen kultura altxorrak, herri jakinduriak eta esperientzia transmisioak aberastu egin dezaketela Lanbide Heziketako ikasleen prestakuntza", nabarmendu dute.
