Euskara mailak egiaztatzeko prozesua abiatu du HABEk

BILBO, 12 (EUROPA PRESS)

HABE Helduen Alfabetatze eta Berreuskalduntzerako Erakundeak ostiral honetan ekin dio euskara mailak egiaztatzeko prozesuari, Barakaldoko BECen (Bizkaia), deialdi irekiko azterketekin, covid-19ak eragindako osasun krisiaren ondorioz probak atzeratzeko erabakia hartu ondoren. Helburua da euskaltegietako ikasleen premiei erantzutea eta etorkizun laburrean abian jarriko diren sektore publikoko lanpostuen eskaintzatan aurkeztuko diren herritarrei aukerak zabaltzea.

Miren Dobaran Eusko Jaurlaritzako Hizkuntza Politikako sailburuordea "oso pozik" azaldu da, ikasleen sarrera "oso ondo" joan delako ostiral honetan. BECen sarreran azaldu duenez, "17-18 urteko gazteak dira, C1ekoak, deialdi irekikoak, eta oso ondo errespetatu dituzte distantziak, musukoak jarrita ekarri dituzte, tenperatura hartuta, eta eskuak garbitu dituzte geletara sartu aurretik. Oso ondo joan da eta espero dugu aste osoan zehar horrela joatea".

Hain zuzen, Dobaranek adierazi du 400dik gora pertsona daudela azterketa egiten ostiral honetan, 74 laguneko sei talde desberdinetan banatuta. BECeko lehen pabiloian hiruna gune prestatu dituzte ezkerraldean eta eskuinaldean. "15.000 metro koadroko pabiloi bat da. Lau futbol zelai", gaineratu du.

Ildo horretan, BECek eskaintzen duen azpiegituaren "ziurtasuna" nabarmendu du Hizkuntza Politikako sailburuordeak, "osasuna delako gauzarik garrantzitsuena une honetan, eta ikusten dugu zelako azpiegitura zabalak diren". "Ea aste osoan zehar horrela doan kontua", adierazi du.

Dobaranek gogoratu du 12.100 bat herritarrek egingo dituztela euskara mailak egiaztatzeko probak. "Batzurentzat behar beharrezkoak diren probak dira, erakunde guztiek egin behar dituzte lan eskaintza publiko asko daudelako udazkenetik aurrera, eta aukera hau ezin zuten galdu. Horregatik poztasun handia sentitzen dugu kapaz izan garelako beraientzako aukera hau antolatzeko eta azkerketak egiteko", ziurtatu du.

EGUTEGIA

HABEk jakinarazi duenez, deialdi irekiko idazmen eta irakurmen probak ostiral honetan eta larunbatean egingo dira, ekainaren 12 eta 13an, eta mintzamen probak uztailaren 20an eta 21ean. Deialdi itxiko proben kasuan, baliozkotu ez direnak ekainaren 15etik 18ra egingo dira, kasu guztietan BECen.

Ekainean zehar honako proba hauek egingo dira: B2 (deialdi itxia, hau da, euskaltegietako ikasleentzat), C1 (deialdi itxia), C1 (deialdi irekia, nahi dutenentzat) eta C2 (deialdi itxia).

B2 itxiko eta C1 itxiko idazmen probak ekainaren 15etik 18ra artean izango dira, BECen, eta ulermenaren (ahozkoa zein idatzizkoa) eta mintzamenaren kasuan, euskaltegian egindakoa baliozkotuko da.

Esan beazla, C1 irekiko idazmen eta irakurmen probak ostiral honetan eta larunbatean izango dira, eta mintzamen probak, uztailaren 20an eta 21ean. Halaber, C2 itxiko idazmen probak ekainaren 15etik 18ra artean egingo dira, BECen, eta ulermenaren (ahozkoa zein idatzizkoa) eta mintzamenaren kasuan, euskaltegian egindakoa baliozkotuko da.

Hortaz, euskaltegietako ikasleen deialdiko entzumen, irakurmen eta mintzamen probak baliozkotu egingo dira, euskaltegian egindako ebaluazio jarduerei balio egiaztatzailea aitortuz. Era berean, A1, A2 eta B1 mailak ebaluazio jarraituaren bidez egiaztatuko dira, euskaltegietan, ohi bezala. Ezarritako egutegia aldagarria izango da, unean uneko premiek hala eskatzen badute.