Garraiolari bat hil da Muxikako enpresa batean zamatze makina batek kolpatuta

BILBO, 24 (EUROPA PRESS)

Garraiolari bat hil zen asteazkenean Muxikako (Bizkaia) Ebaki enpresan zamatze lanak egiten ari ziren bitartean zamaketa makina batek kolpatu ondoren, LAB sindikatuak ohar baten bidez jakinarazi duenez.

Hain zuzen, sindikatuak azaldu du azpikontratatutako garraio enpresa bateko langilea tokian bertan artatu zutela anbulantzia medikalizatu batean, baina zauri larrien eraginez hil zela handik ordu batzuetara. LABek doluminak eta elkartasuna adierazi dizkie hildako langilearen senide, lagun eta gertukoei.

Sindikatuak gogorarazi du prebentzio araudiak aurreikusten duela egoera hau, eta zamatze lanetarako enpresa kontratatzaileek prozedurak garatuta izan behar dituztela garraiolariak kabinan bertan itxaron edo gune seguruetan egon behar izateko.

"Beraz, koordinazio prozedura bat garatu beharra dago derrigor arrisku mota hau kontrolatzeko. Atzo, prozedura ez zegoen garatuta edo ez zen abian ipini Bi aukerak enpresariak dinamizatu behar ditu legeak arautzen duen moduan", azaldu du.

LABek galdetu du nola ekidingo duen langile batek honelako istripu bat "enpresak protokolorik garatu ez badu, edo garatuta izanik ere berau betearazteko errekurtso prebentiborik eta bitartekorik jartzen ez badu".

"Ardura enpresariaren bizkarretik kentzeak istripuak eta heriotzak soilik dakartza, eta tamalez administrazioa betetzen ari den papera hori da, ardurak bitartekoak ez dituzten langileei zabaldu eta enpresarien inpunitatea babestearena, hain zuzen", salatu du.

LABek ziurtatu du hori dela istripuen atzean dagoen "oinarrizko arrazoia, administrazioak 30 urte daramatzala enpresarien inpunitatea babesten". "Aurten dagoeneko 41 hildako utzi dituen erabakia", gaineratu du.

Azkenik, Ebaki enpresako langile batzordeak datozen orduetan deituko dituen lanuzte eta mobilizazioekin bat egiten duela jakinarazi du LAB sindikatuak.