Gipuzkoako Aldundiak 2026ko egutegia osatzeko argazki lehiaketa abiatu du

DONOSTIA 29 Jul. (EUROPA PRESS) -

Gipuzkoako Foru Aldundiak 2026. urteko egutegia irudiz hornitzeko balioko duen argazki lehiaketaren edizio berria jarri du martxan du. Herritarrek asko estimatzen duten argitalpena da, eta iaz 40.000 ale banatu ziren lurralde osoan, foru erakundetik jakinarazi dutenez.

Lehiaketaren bederatzigarren edizioa da aurtengoa, eta Gipuzkoako Argazkilari Elkartearekin lankidetzan antolatzen da, urtero bezala. Parte hartzeko epea irailaren 1etik 30era arte izango da.

Aurtengo leloa 'Ekin. Zaindu. Bizi' izango da; horrekin, herritarrei proposatuko zaie Gipuzkoa definitzen duten balioak islatzen dituzten argazkiak egitea.

Irune Berasaluze Gipuzkoako Aldundiko bozeramaileak parte hartzera eta uda aprobetxatzera animatu ditu herritarrak, "sasoi hau bereziki inspiratzailea baita gure lurraldearen izaera berezia erretratatzeko: paisaia, jendea, ohiturak eta sustraiak galdu gabe etorkizunari begiratzeko modua islatzen duten irudiak".

"Gipuzkoa lurralde bizia eta dinamikoa da, aparteko ingurune naturalarekin, sakon errotutako tradizioekin eta balio komunitario sendoekin. Aldi berean, lurralde industriala ere bada, etorkizunerantz aurrera egiteko ekimenak bultzatzen dituena, pertsonak eta ingurumena zainduz. Azken batean, guztion ongizatearen alde lan egiten duen lurraldea", azaldu du.

Berasaluzek nabarmendu du foru egutegia "oso argitalpen maitatua" dela, urtero Gipuzkoako milaka etxetara iristen dela, eta "dagoeneko nortasun partekatuaren sinbolo txiki" ere bihurtu dela.

Parte hartzeko oinarriak eta formularioa www.gipuzkoa.eus/argazki-lehiaketa web orrian egongo dira eskuragarri irailaren 1etik aurrera. 18 urtetik gorako pertsona guztiek parte hartu ahal izango dute, argazkigintzako profesionalak izan edo ez, eta pertsona bakoitzak gehienez hiru irudi aurkeztu ahal izango ditu. Argazki guztiak Gipuzkoan aterata egon beharko dira.

Aurkezteko epea irailaren 30era arte egongo da zabalik, eta azaroan sariak banatzeko ekitaldia egingo da. Egutegiaren azala ilustratuko duen argazki irabazleak 1.000 euroko saria izango du, eta aukeratutako 12 irudien egileek 250na euro jasoko dituzte.