Gipuzkoako Aldundiak 7,1 milioi euro erabiliko ditu AP-8, AP-1 eta GI-20ko zoruak birgaitzeko

DONOSTIA, 6 (EUROPA PRESS)

Bidegi foru erakundeak AP-8 eta AP-1 autobideetako eta GI-20 errepideko 18 zatiren errodadura geruza berritzeko proiektuaren lizitazioa onartu du. Aurrekontua 7.121.253 euro da, gehi BEZ, eta lanak gauzatzeko epea 24 hilabete izango da, esleitzen denetik aurrera.

Gipuzkoako Foru Aldunditik jakinarazi dutenez, proiektuak batez ere AP-8 autobideari eragiten dio, 18 zati birgaituko baitira. AP-1ean eta GI-20 errepidean bina zati berrituko dira, eta AP-1eko 133. irteera adarrean ere jardungo da, Bergaran.

Guztira, 21,6 kilometro linealeko zorua berrituko da, horietatik 5,2 kilometro Bilbo eta Gasteizerako norakoetan eta 16,4 kilometro Behobiara bidean. Berrituko diren tarteen luzera 407 metrotik 2,7 kilometrora bitartekoa izango da, eta horietatik 12 zati kilometro bat baino gehiagoko luzerakoak izango dira.

Zehazki, AP-8an berrituko diren 13 zatiak, Getariako 42,710 kilometro puntuaren eta Eibarko 70,908 kilometro puntuaren artean daude. Horrela, Zumaia-Getaria terminoetan, Urolako zubibidearen eta Meagasko tunelaren arteko tartea berrituko da (43,816 eta 42,710 kilometroak), Behobiarako noranzkoan.

Zestoako ordainlekuaren parean beste bi zati berrituko dira Behobiara bidean, guztira 2,7 kilometroko luzerarekin. Deba eta Mendaro artean, bi norabideetan eta sei zatitan banatuta, autobideko bederatzi kilometro birgaituko dira, Lizaranzuko zubibidea eta Istiñako tunela barne.

Elgoibarren, San Antolingo zubibidearen parean, kilometro bateko luzerako zorua berrituko da Behobiarako noranzkoan, eta ia beste 600 metro Bilbora bidean. Azkenik, Eibarren, 1,1 kilometroko erreia berrituko da Behobiarako noranzkoan.

Bestalde, AP-1ean, zorua berritzeak autobidearen enborreko bi zatiri eragingo die Bergaran, Gasteizerako noranzkoan, eta autobidetik herri bererako irteera-adarrari. Erabateko birgaitzea 3,8 kilometroko asfalto luzerari eragingo dio. GI-20 errepidean, Donostia parean, bi zati berrituko dira, noranzko bakoitzean bana, bi kilometroko luzerarekin.

Halaber, errepide zatiak birgaitzeak eragiten dien egituretan dilatazio junturak aldatuko dira eta zirkulazio edukierarako espirak berrituko dira.

NEURRIAK

Birgaitzeak erabat operatiboak diren eta trafiko intentsitate handia duten bideei eragingo dienez, zenbait neurri hartuko dira, trafikoan sor daitezken eraginak ahalik eta txikienak izan daitezen.

Horrela, astelehenetik ostiralera, AP-8an eta GI-20an beharrezkoak diren errei mozketak 11:00etatik aurrera egingo dira zati batzuetan eta gauez beste batzuetan, goizeko puntako orduak saihestuz. By-pass bidezko desbideratzeak asteburuetan egingo dira. AP-1ean ez da mugarik egongo mozketak eta desbideratzeak egiteko.

Uztailean, abuztuan eta irailaren erdialdera arte, aste barruan ezin izango da inolako lanik egin zati batzuetan, eta beste batzuetan gauez egingo dira, oporren eta irteera eta itzulera operazioen ondorioz trafikoak gora egiten duen egunak baitira. Beti ere mozketak aurrez ohartaraziko dira.