Greba mugagabea egingo dute Tubos Reunidoseko Amurrioko lantegian martxoaren 16tik

BILBO 11 (EUROPA PRESS)

Tubos Reunidos konpainiak Amurrion duen enpresa batzordeak (ELA, LAB eta ESK) greba mugagabera deitu du martxoaren 16tik aurrera Arabako udalerriko lantegian, enplegu erregulazioko espedientea eta enpresak planteatutako gainerako neurriak errefusatzeko, ESK sindikatuko iturriek Europa Press albiste agentziari adierazi diotenez.

Asteazken honetan bilkura informatiboa izan da, eta ELA, LAB eta ESK sindikatuek greba mugagabea egiteko proposamena egin dute bertan; hiru sindikatuok 14 ordezkari dituzte langile batzordean, eta denera 21 daude.

Bada, aipaturiko iturrien arabera, langileen bilkura "aldarria" izan da eta ez dio trabarik jarri mobilizazioak areagotzeari eta greba mugagabea deitzeari. ESKtik zehaztu dutenez, CCOO eta UGT sindikatuek esan dute ez dutela proposamena partekatzen baina errespetatzen dutela.

Beraz, greba mugagabea izango da Amurrioko lantegian martxoaren 16tik. Deialdia aurreko egunean hasiko litzateke, hilaren 15ean, 22:00etako txandarekin, baina aurretik egun horretarako lau orduko lanuztea deitu zenez, 18:00etatik egongo da indarrean.

ESK sindikatutik adierazi dutenez, greba orokorraren planteamenduarekin "borrokatu" egin nahi dute enpresak onar dezan langile batzordeak egindako proposamena, enplegu erregulazio espedientea eta altzairutegia ixtea moduko neurriak bertan behera uzteko.

Sindikatuarentzat, akordio sozial baten alde lan egin beharko litzateke, bideragarritasun plan bat abiarazteko eta enpresarentzat "norabide" bat zehazteko, "derrigorrezko kaleratzeen" aukerarik izan gabe.

ESK-k dio oraindik ez dutela ulertzen zergatik luzatu den enplegu erregulazioko espedientearen kontsultarako epea, enpresak "kaleratzeen planteamendua deus aldatu ez badu", ez dagoelako arrazoirik negoziazioa luzatzeko. Edonola ere, bileretara joago dela iragarri du, "egiten dena zaintzeko", eta ostiraleko bilkura beste egun batera aldatzea eskatu du.