BILBO, 28 (EUROPA PRESS)
Euskal ikertzaile gazteei zuzendutako #txiotesia4 Twitterreko lehiaketako sariak banatzeko ekitaldia egingo da ostegunean, azaroaren 29an, Bilboko Bira kulturgunean. Ekitaldia arratsaldeko 19:00etan hasiko da, Udako Euskal Unibertsitateak (UEU) jakinarazi duenez.
"Txiokatu zure tesia 6 mezutan" izenburupean, lehiakideek euskarazko sei txiotan laburtu behar zuten tesia. Bi sari banatuko dira: Txiolari ulergarriena (500 euro) eta Txiolari originalena (300 euro).
Lehiaketaren helburu nagusia da euskal ikertzaileei izen-abizenak jartzea eta egiten dituzten lanak gizarteratzea. Lehiaketa bukatuta, ostegunean jakingo dugu nortzuk diren edizio honetako irabazleak.
