Italiari buruzko grabatuak izango dira Bilboko Artelan Berreginen Museoko "obra gonbidatua" ostegun honetan

BILBO 28 Ene. (EUROPA PRESS) -

Bilboko Artelan Berreginen Museoak "Artelana bere testuinguruan" ekimeneko beste saio bat egingo du ostegun honetan, urtarrilaren 28an, eta "obra gonbidatua" Italiari buruzko grabatuak izango dira, museoak aldi baterako hartu duen "Grand Tour. Italia" erakusketakoak, hain zuzen ere. Bisita gidatua 18:00etan hasiko da.

"Artelana bere testuinguruan" hitzaldi zikloak, oro har, museoko bildumako pieza baten inguruan sakontzen du. Hala ere, oraingoan, hitzaldian hizpide izango diren grabatuak Euskal Museoaren bildumakoak dira. Bi museoak Bilboko Udalaren eta Bizkaiko Foru Aldundiaren menpekoak dira.

Bista optikoak bezala ezagutzen diren irudi horien bitartez, bisitariek jakingo dute zergatik izan ziren hain ospetsuak XVIII. eta XIX. mendeetan. Gailu optikoetan ikusteko grabatuak ziren, eta, lente baten bidez begiratzean, sakontasun sentsazioa nabarmen handitzen zuten.

Horregatik, ia bista optiko guztiek gai topografikoak lantzen zituzten: hirien bistak, eraikinen bistak. "Esan daiteke bista optikoak 3D teknologiaren aitzindariak izan zirela. Gaur egun, oso ohikoa da zinemetan 3D teknologia ikustea; gizakion hiru dimentsioko ikuspegi erreala simulatzen da bertan", azaldu dute museoko arduradunek.

Irudiak ahalik eta modu errealenean erakusten saiatzeko interesa agertu zuten artistek, eta gai hori izango da mintzagai hitzaldian. Irudi horiek inoiz ikusi ez zituen jendeari modurik eraginkorrenean ikusarazi nahi zizkieten garai hartan.

Era berean, XVIII. mendean zeuden lau produkzio zentrorik esanguratsuenak ere ezagutu ahal izango dira, hau da, Londres, Paris, Habsburgo eta Basano. Lau zentro horiek berebiziko garrantzia izan zuten grabatuen banaketan.

"Gran Tour. Italia" aldi baterako erakusketaren parte diren bista optikoak XVIII. mendeko Parisko tailer famatuetatik datoz, adibidez, Mondhare edo Maillet tailerretatik. Horietan, obra mota horren berezko ezaugarri guztiak antzeman daitezke. Elementu arkitektonikoak (barrualdean zein kanpoaldean) irudikatzen dituzten akuaforteak dira. Perspektiba linealaren lege zorrotzei jarraitzen zieten; horiei esker, gailu edo makina optiko baten laguntzaz, XVIII. mendean hain liluragarria izan zen sakontasun ilusioa sortzen zen.