BILBO, 7 (EUROPA PRESS)
Jennifer Huidobro Euskal Herriko Unibertsitateko (EHU) IBeA (Ikerkuntza eta Berrikuntza Analitikoa) ikertaldeko ikertzaileak Abraham Zacut saria jaso du Iberiar Penintsulako doktorego tesi onenarengatik, espazioaren esplorazioari egindako ekarpen zientifikoa dela eta. 'Exploring Martian and Lunar Geochemistry through the study of meteorites, analogs, laboratory simulation, and mission data analysis' izeneko bere tesiak NASAren Mars2020 misioaren SuperCam tresnari lagundu dio.
EHUko iturriek jakinarazi dutenez, Abraham Zacut sarien lehenengo edizioa izan da aurtengoa, eta Europlanet Society elkarteko nodo iberiarrak eman ditu. Europako komunitate zientifikoan planeten gaineko ikerketari laguntzea eta hura sustatzea eta espazioko teknologia garatzea dira Europlanet Society elkartearen helburu nagusiak.
Huidobroren ikerketak laguntza eman dio NASAren Mars2020 misioko SuperCam tresnari. Tresna horrek Marteko arrokak eta lurzoruak aztertzen ditu kamera baten, bi laserren eta lau espektrometroren bidez, planetaren mineral egitura eta elementu kimikoak aztertzeko edo bizitzarekin harremanen bat izan lezaketen organismoak detektatzeko asmoz.
"Doktorego tesia Ilargiko eta Marteko materialen azterketa geokimikoan zentratzen da, adibidez, meteoritoen eta Lurreko analogoen azterketan (Ilargiko edo Marteko ezaugarrien antzekoak dituzten materialak Lurrean). Horrez gain, simulazioak egin ditut laborategian, egungo eta etorkizuneko espazioko misioei laguntza zientifikoa emateko. Halaber, mineral hidratatuak topatu dira Marteko Jezero kraterrean, hortaz, baieztatu daiteke ura dagoela alboko planetako mineralen egitura kristalinoen barruan", azaldu du EHUko ikertzaileak.
Halaber, Huidobroren ikerketak sostengua emango die etorkizuneko beste misio batzuei, hala nola Europako Espazio Agentziaren (ESA) Rosalind Franklin misioari eta Esplorazio Aeroespazialerako Japoniako Agentziaren (JAXA) Martian Moons eXprolation misioari.
JENNIFER HUIDOBRO
Jennifer Huidobro Martin Villarcayon (Burgos, Espainia) jaio zen eta EHUn hasi zuen ibilbide akademikoa, Kimikako Gradua eta 'Paisaiaren Kudeaketa. Ondarea, Lurraldea eta Hiria' masterra ikasiz. Ikertzaile gisa jarraitu zuen EHUn, Juan Manuel Madariaga Mota katedradunak eta Julene Aramendia Gutierrez ikertzaileak gainbegiratuta, Eusko Jaurlaritzaren doktorego aurreko bekaren laguntzarekin.
Nevadako Unibertsitatean (AEB) egin zuen ikerketa egonaldia eta, 2023ko maiatzean, doktore titulua lortu zuen Cum Laude notarekin eta nazioarteko merituarekin, 'Exploring Martian and Lunar geochemistry through the study of meteorites, analogs, simulation work, and analysis of mission data' tesia aurkeztuta.
Une honetan doktorego ondorengo ikertzailea da EHUn, Kimika Analitikoa Sailean eta IBeA ikertaldean, Eusko Jaurlaritzaren IKUR plan estrategikoaren barruan.
IBeA (Ikerkuntza eta Berrikuntza Analitikoa) ikertaldea espazioko hainbat misioren parte da, hala nola NASAren Mars2020 misioaren SuperCam neurketa instrumentuaren eta ESAren Rosalind Franklin misioaren parte. Gainera, SIGUE-Mars sareko kidea da; Espainiako lantaldea da, Marteren eta zeruko beste gorputz batzuen azterketa geokimikoa egiten duena eta espazioa arakatzeko tresneria garatzen duena.
