Lea-Artibaiko Enplegu Azokak 18 enpresa eta erakunde bilduko ditu ostiralean Markina-Xemeinen

BILBO 5 Jun. (EUROPA PRESS) -

Leartibai Fundazioak Lea-Artibaiko Enplegu Azokaren edizio berria antolatu du ostiralerako, ekainaren 6rako, Markina-Xemeingo (Bizkaia) Lea-Artibai berrikuntza gunean, eta eskualdeko eta inguruko 18 enpresa eta erakunde bilduko ditu.

Ekitaldia Bizkaia Gazteak Lea-Artibai ekimenaren baitan antolatu da, eta bere helburu nagusia Lea-Artibaiko gazteen laneratzea eta enplegagarritasuna sustatzea da. Horretarako, azoka formatu batean planteatuta, gazteek euren curriculumak enpresei eskura emateko aukera izango dute, baita aurrez aurre enpresekin harremanetan jartzeko.

Antolatzaileek jakinarazi dutenez, eskualdeko eta inguruko 18 enpresa eta erakundee laneratzeko dituzten aukerak aurkeztu dizkiete gazteei euren standetan, eta lan poltsa ezberdinetan sartzeko aukera eskainiko diete.

Guztira, 60 lan eskaintza baino gehiago eta praktikaldietara aukera ezberdinak egongo dira: mantenu teknikariak, administrariak, muntaia adituak, biltegirako langileak, ADE eta marketin profilak, komertzialak, magisteritza tituludunak, produkzio langileak, proiektu buruak, logistika langileak, zibersegurtasun teknikariak, ingeniariak, laborategi diseinatzaileak eta beste hainbat lan aukera aurkituko dituzte Lea-Artibaiko Enplegu Azokara bertaratzen direnek.

Burdinola Safer Labs (Amoroto), Cikautxo S.Coop. (Berriatua), Eika S.Coop. (Etxebarria), Eze Barrizar (Markina-Xemein), Fagor Arrasate S.Coop. (Etxebarria), Kide S.Coop. (Berriatua), Itsaskorda (Markina-Xemein), Kautenik (Berriatua), Laboral Kutxa, Lantegi Batuak, Lanbide (Ondarroa), Leartiker Zentro Teknologikoa (Markina-Xemein), Lea Artibai Ikastetxea (Markina-Xemein), Maier S.Coop. (Gernika-Lumo), Nemak (Etxebarria), Novia Salcedo Fundazioa (Bilbo) eta Orbea (Mallabia) enpresek standak jarriko dituzte azokan.

Leartibai Fundazioa ere bertan izango da eskualdeko merkataritza, turismo eta ostalaritzan lan egin nahi duten gazteen curriculumak jasotzen.