San Mamesen dituen palkoak 122 antolakuntza eta elkartek erabiltzeko utzi ditu Bizkaiko Aldundiak

BILBO 28 Jun. (EUROPA PRESS) -

Bizkaiko Foru Aldundiak San Mamesen dituen bi palkoak erabiltzeko gonbidapenak jaso dituzte 122 antolakuntza eta elkartetako kide diren 152 pertsonek, foru erakundeak palko horien lagapena egin dielako. Horrela, foru erakundeak bere palkoak ireki ditu atzerriko enbaxada eta erakundeetako sei ordezkarirentzat, euskal udal eta toki erakunde eta erakunde publikoetako 37 ordezkarirentzat edota kultura, kirola eta euskararen garapena sustatzen lan egiten duten 21 pertsonarentzat. Halaber, palkoetara joan dira enpresa erakundeetako 44 eskuorde eta elkarte eta GKEetako beste 44 ordezkari.

Palkoek 10 eta 12 pertsonentzako lekua dute, eta erabilerarako irizpide nagusiak bi izan dira, Bizkaiko Aldundiak joan den otsailean eman zuen instrukzio baten jasota daudenak: alde batetik, Bizkaian eta Bizkaiaren alde lan egiten duten erakunde, talde eta pertsonen eskura jartzea, egiten dute lana eskertzeko, eta, bestetik, Aldundiak erakunde mailan dituen konpromiso garrantzitsuei erantzutea.

"Bizkaiko Foru Aldundiarentzat palkoak erakunde mailako erlazioak finkatzeko aukera dira. Harremanetarako aktiboak dira, aldi berean, gure lurraldearen aberastasun kulturalaren hedakuntzan eragina dutenak", adierazi du Herri Administraziorako eta Erakunde Harremanetarako Saileko diputatu Ibone Bengoetxeak.

Bere hitzetan, palkoen okupazioa "aukera ezin hobea" da San Mameseko esperientzia lurraldearen alde lan egiten duten Bizkaiko laguntzaileengana eta eragile sozioekonomikoengana zabaltzeko, besteak beste, "enpresa mailako erakunde, hirugarren sektoreko eta irabazteko asmorik gabeko antolakuntza eta Aldundiarekin lankidetzan jarduten duten beste erakundeengana ere".

"Erakunde mailako erabileraren eta, Bizkaiaren alde egiten duten lana eskertuz, mota horietako antolakuntzei lagapenean uztearen arteko oreka bilatu nahi dugu", adierazi du Bengoetxeak.