Tartean Teatroak 'Kandida' taularatuko du otsailaren 3an eta 4an Bilboko Arriaga Antzokian

BILBO 22 (EUROPA PRESS)

Tartean Teatroa konpainiak 'Kandida' izenburuko lan berria aurkeztuko du Bilboko Arriaga Antzokian otsailaren 3an eta 4an. Patxo Telleriak idatzi eta zuzenduta obrak Miren Gaztañaga, Nerea Mazo eta Mikel Martinez antzezleak bilduko ditu oholtza gainean.

Arriaga Antzokitik adierazi dutenez, 'Kandida' lanean, Patxo Telleriak bere antzezlanetan "hain bereizgarria" den tonu tragikomikoa mantendu du, hainbat gai sakon jorratuz, hala nola arrakasta lortzeko edozer egitearen mugak, bizitza baten lapurreta metaforikoa eta gizartean gero eta ohikoagoak diren etxegabetzeak.

"Azken finean, antzezlanak galdera unibertsal, sakon eta funtsezkoei heltzen die. 'Kandida' paralelismoz betetako istorioa da, mundu desberdinak kontrajartzen eta alderatzen dituen istorioa", azaldu dute Bilboko antzokitik.

Ekoizpenean euskal artista ospetsuek eta hainbat arlotako espezialistak hartzen dute parte. Eszenografia eta jantzien diseinua Ikerne Gimenez eta Igone Tesorena da, eta jatorrizko musika Adrian Garcia de los Ojosena; ikus-entzunezko elementuak Buffalo Produkzioak-eko Jone Novorenak dira.

Antzezlanaren argumentuari dagokionez, Klara Balzes idazle gazteak, bere lehen nobela idatzi du, 'Kandida' izenburukoa, etxegabe bati buruzko istorioa. Kandida fikziozko pertsonaia da, baina benetako pertsona batean oinarrituta dago, Klarak desahuziatuen aldeko elkarte batean ezagutu zuen Manuelan.

Eleberrian, Klarak bere etxean jasoko du Kandida; errealitatean, Klarak Manuelaren arrastoa galdu zuen betirako. Nobela argitaratzen den egunean, Manuela Klararen etxean agertuko da, eta nobelan egin duen gauza bera egiteko eskatuko dio gazteari: bere etxean jasotzea.

Emanaldiak 19:30ean hasiko dira otsailaren 3an zein 4an, eta sarrerak sakgai daude, 18 euroan (beherapenekin), www.teatroarriaga.eus webgunean eta Arriaga Antzokiko txarteldegietan, aurretiazko salmenta ordutegian.